„Најважното тело во светот основано по 1945 година не се изјасни за ништо важно, а камоли за руската агресија во Украина и војната на Блискиот Исток“, рече Пленковиќ во својот воведен говор на Форумот на Меѓународната демократска унија (ИДУ) во Загреб, пишува Индекс.
Тој рече дека со оглед на парализата на Советот за безбедност на ОН поради правото на вето, среде кризата „од такви размери“ можеме да се запрашаме дали клучните меѓународни организации воопшто функционираат.
Се чини дека светот, за кој некогаш се веруваше дека се темели на мултилатерализам и меѓународно право, не ги исполнува двете главни очекувања што беа „мантра за повеќето наши партии и меѓународни организации“, рече хрватскиот премиер.
„Кога ќе ја погледнете руската агресија врз Украина денес, можете да се запрашате колку вреди меѓународното право? Дали воопшто постои?“, додаде Пленковиќ, нарекувајќи го важно реторичко прашање.
Форумот на ИДУ собира околу 250 претставници на партии од околу 50 земји од целиот свет, а настанот е организиран од Хрватската демократска заедница во хотелот „Еспланада“ во Загреб.
ИДУ ги собира на глобално ниво партиите од десниот центар кои делат демократски вредности, се вели во соопштението на организацијата.
„Меѓу другите теми, политичките лидери на панелите ќе разговараат за трансатлантските односи во новата геополитичка ера, европската перспектива на Југоисточна Европа, миграциските и демографските предизвици, безбедносната архитектура и стратешката автономија на Европската Унија“, се додава во соопштението.
Форумот на ИДУ е во голема мера затворен за јавноста, а премиерот Пленковиќ ќе се сретне на маргините со претседателот на ИДУ, поранешниот канадски премиер Стивен Харпер, високиот претставник во БиХ, Кристијан Шмит, и поранешниот украински претседател Петро Порошенко, кои учествуваат на собирот.
