Трамп ги отстрани преостанатите тројца членови на Комисијата за помош при изборите од нивните функции, објавија неколку американски медиуми. Агенцијата е основана од Конгресот во 2002 година и има за цел да обезбеди поддршка на државите, вклучително и федерални средства, во организирањето избори.
Спроведувањето на изборите во Соединетите Американски Држави е во суштина одговорност на државите, а не на федералната влада. По правило, комисијата треба да има четири члена, двајца од Републиканската партија и двајца од Демократската партија. Но, неодамна имаше само три члена бидејќи едно место беше испразнето.
Трамп очигледно сака да предизвика хаос во изборниот процес, оцени Адриан Фонтес, демократ и државен секретар на Аризона, чија канцеларија ги спроведува изборите во таа држава.
„Овој потег го поткопува интегритетот на непартиската изборна администрација“, рече Фонтес во соопштението.
Други критичари исто така изразија незадоволство од одлуката, опишувајќи ја како загрижувачки обид за мешање во изборите.
Кон крајот на јуни, Врховниот суд на САД значително ги прошири овластувањата на претседателот над независните федерални агенции кога донесе пресуда во случај кој се однесуваше на Федералната трговска комисија (ФТЦ), регулаторот за заштита на пазарната конкуренција.
Експертите за административно право во тоа време изјавија дека пресудата веројатно ќе влијае на други агенции и дека Трамп ќе ја искористи за да ги прошири своите овластувања над тела кои претходно биле независни.
