Ормускиот теснец, клучен пат за глобални испораки на нафта и течен природен гас (ЛНГ), внимателно е следен од бродските компании и владите по иранските напади врз комерцијални бродови оваа недела и американската одмазда, што го намалија сообраќајот низ водниот пат.
Сепак, најмалку пет танкери со ЛНГ влегле во теснецот во последните денови, според податоците на Кплер и ЛСЕГ. Меѓу бродовите се Гаслог Шангај, управуван од грчката бродска компанија Гаслог, и бродови поврзани со Катар енерџи, Ал Самрија, Ал Дафна, Ал Гатара и Ал Рајан.
Гаслог Шангај и Ал Рајан веројатно влегле во теснецот преку ноќ откако биле видени надвор од пловниот пат на 9 јули, според податоците. Другите три брода поврзани со Катар енерџи последен пат биле видени надвор од Ормускиот теснец, покрај западниот брег на Индија, пред неколку недели.
Вчера, танкерот за сурова нафта ВЛЦЦ Нисос Кеа влегол во теснецот, додека ВЛЦЦ Лила Вадинар излегол.
„Она што е различно сега, во споредба со времето кога започна конфликтот, е тоа што Иран ги таргетира бродовите што ја користат „оманската рута“, наместо да ги таргетира сите бродови, што значи дека бродовите сè повеќе ќе се свртуваат кон „иранската рута“ или ќе го користат мракот за да го поминат теснецот“, рече Ксавиер Танг, виш пазарен аналитичар во Вортекс.
Во меѓувреме, 22 брода поврзани со Јапонија, вклучувајќи шест големи танкери за сурова нафта, поминале низ теснецот помеѓу 7 и 9 јули за да излезат од него, изјави јапонскиот министер за транспорт Јасуши Канеко на прес-конференција во петокот.
Кога беше прашан како е обезбедена сигурноста на бродовите, службено лице од Одделот за прекуокеански превоз при Министерството за транспорт одби да коментира, наведувајќи безбедносни причини.
