Во документ насловен „Бускандо вида“ (Барајќи живот), организацијата за човекови права забележува дека нафтената блокада што ја воведе Вашингтон од јануари „ја влошува енергетската криза во земјата, ги влошува прекините во снабдувањето со струја, недостигот од вода и ги забавува јавните услуги“.
„Ова го нарушува речиси секој аспект од секојдневниот живот, додека влошените услови за живот принудуваат многу Кубанци да се борат за својот опстанок секојдневно“, се наведува во текстот објавен на веб-страницата на организацијата.
Освен што чекаат да се обноват струјата и водата поради честите прекини, многу Кубанци ги поминуваат деновите барајќи храна, извор на приход и лекови, соопшти невладината организација, чиј истражувач неодамна го посети островот и интервјуираше десетици жители.
Во исто време, „без разлика колку се тешки нивните услови за живот, Кубанците не се слободни да го изразат своето незадоволство. Владата ги затвора оние што се осмелуваат да проговорат“, додава организацијата, која проценува дека во Куба има околу 800 политички затвореници.
„Ниту политиките на кубанската влада ниту политиките на американската влада не треба да ја нарушат можноста на обичните Кубанци да добијат основна храна или лекови, ниту нивната слобода да ги изразат слободно условите во кои живеат“, се наведува во текстот.
