Оваа бројка ја презентираше Ен Кист-Батлер, директорка на Штабот за владини комуникации.
Иако и Киев и Москва редовно објавуваат проценки за бројот на загинати непријатели, тие не сакаат да зборуваат за сопствените загуби на фронтот.
Сепак, претседателот на Украина, Володимир Зеленски, во февруари изјави дека неговата земја изгубила 55.000 војници од 2022 година.
Руската новинска служба на Би-би-си ги брои руските жртви во војната заедно со независниот медиум Медијазон и група волонтери. Листата се состои од имиња и презимиња на луѓе чија смрт може да се потврди од официјални извештаи, медиуми, социјални медиуми, новоизградени споменици и гробови.
Би-би-си досега ја потврди смртта на 223.539 именувани војници и офицери кои загинале во руско-украинската војна на руска страна.
Се верува дека вистинскиот број на жртви е многу поголем, а воените експерти консултирани од Би-би-си веруваат дека регистарот на британскиот јавен сервис за загинати од руска страна претставува помеѓу 45 и 65 проценти од вистинскиот број на жртви.
Кист-Батлер во својот инаугуративен говор во Блечли Парк, предупреди дека ова е „вознемирувачки момент“ за Велика Британија, со оглед на бројот на руски жртви, бидејќи Русија „немилосрдно ја напаѓаше“ критичната инфраструктура низ целата земја со низа шпионски заговори на британска почва, а неодамна и со водење непријавена „хибридна војна“ против Велика Британија и другите земји-членки на НАТО.
Според неа, Русија напаѓа „критична инфраструктура, демократски процеси, синџири на снабдување и јавна доверба“, Кремљ ги негира овие тврдења.
Кист-Батлер, исто така, предупреди дека Русија и Кина значително инвестираат во вселенски проекти – и за мирни и за воени цели.
Владиниот штаб за комуникации, со кој таа раководи, е најголемата британска агенција за разузнавање, безбедност и сајбер безбедност, првенствено одговорна за собирање и анализа на разузнавачки информации преку пресретнување на електронски сигнали, комуникации и податоци, како и за информациската безбедност на британската влада и вооружените сили.
Работејќи заедно со МИ5 (домашна безбедност) и МИ6 (разузнавачка служба што дејствува во странство), Штабот за владини комуникации е специјализиран за криптографија, сајбер безбедност и комуникациски надзор за да ја заштити земјата од сајбер напади, тероризам и непријателски држави. Штабот работи под политички надзор на министерот за надворешни работи.
