Меѓу производите што ќе бидат погодени се и производи за секојдневна употреба, како што се виното и хокеарските стапови, како и индустриски производи, меѓу кои и цементот. Сепак, неколку клучни извозни производи ќе бидат изземени, вклучувајќи енергенси, калиумова руда, критични минерали и риба.
Канадскиот премиер Марк Карни одговори дека Канада е подготвена во наредните недели да ги „интензивира“ трговските преговори со Соединетите Американски Држави.
Белата куќа соопшти дека царините ќе стапат во сила за 30 дена, пренесува Би-би-си. Овој потег претставува значително заострување на трговските тензии меѓу северноамериканските соседи.
Канада беше една од ретките земји што во 2025 година возвратија на царините на Трамп, воведувајќи царина од 25 отсто за американска стока во вредност од околу 30 милијарди канадски долари, односно 21,7 милијарди американски долари. Карни подоцна укина дел од тие мерки, но ги задржа царините за американските автомобили, челикот и алуминиумот.
Врховниот суд на САД претходно оваа година пресуди дека многу од царините што Трамп ги воведе низ светот врз основа на вонредни овластувања биле незаконски прогласени. Сепак, неговиот најнов потег од понеделникот вечерта се темели на друг, малку познат закон, кој сè уште не бил тестиран пред суд.
Новите царини се однесуваат на целата опфатена стока, без оглед на тоа дали производот е вклучен во постојниот договор за слободна трговија меѓу Канада, САД и Мексико, познат како УСМЦА.
„Ова е најнов во низата еднострани трговски потези на САД, кои почнаа кога Соединетите Американски Држави воведоа низа царини со што директно го прекршија Договорот меѓу Канада, Соединетите Американски Држави и Мексико“, објави Карни на Икс.
Тој ги спомена и „заканите за канадскиот суверенитет“, што би можело да се однесува на повиците на Трамп северниот сосед на САД да стане 51-та американска сојузна држава.
Царините на увозот, најавени во понеделникот, се надоврзуваат на трговските бариери што веќе постојат меѓу двете земји.
САД веќе применуваат царини од 15 до 50 отсто за канадскиот челик, алуминиум и бакар. Вашингтон, исто така, наплатува царина од 35 отсто за канадската иглолисна граѓа, како и царина од 25 отсто за автомобилски делови што не се произведени во САД.
Канада, од друга страна, применува противцарина од 25 отсто за одреден увоз на американски челик, алуминиум и возила.
Најавата од понеделникот уследи по заканата на претседателот Трамп дека ќе воведе царини поради чадот од шумските пожари во Канада што стигна до американските градови.
Меѓутоа, во извршните наредби што Трамп ги потпиша во понеделникот нема никакво спомнување на шумските пожари.
Наместо тоа, во трите претседателски прогласи се наведени прашања што одамна предизвикуваат незадоволство кај САД во трговијата со Канада, а се однесуваат на автомобилите, млечните производи и алкохолот. Тоа укажува на пропаст на трговските преговори меѓу двете земји.
Кога станува збор за автомобилите, Трамп ја обвинува Канада дека наплатува царина за американските моторни возила и делови што не се опфатени со договорот УСМЦА.
Тој тврди дека тоа е „неразумно“ и дека Канада ги дискриминира САД затоа што не наплатува слична царина за другите земји.
Автомобилската индустрија во Северна Америка во голема мера е интегрирана меѓу Канада, САД и Мексико.
Сепак, министерот за трговија на Трамп, Хауард Лутник, претходно изјави дека смета оти Канада треба да биде „на второ место“ во однос на САД.
Трамп и претходно ја посочуваше автомобилската индустрија како една од областите во кои двете земји имаат спротивставени интереси.
Млечните производи одамна претставуваат спорно прашање за САД, особено поради канадскиот систем за управување со понудата, со кој се ограничува увозот од странство. За количествата што ги надминуваат пропишаните лимити се наплатуваат царини повисоки и од 300 отсто.
Конечно, долготрајниот бојкот на американските алкохолни пијалаци во повеќето канадски покраини стана една од главните спорни точки за Американците, откако беше воведен минатата година.
Премиерите на канадските покраини повеќепати порачаа дека бојкотот ќе биде укинат доколку САД ги укинат царините за клучните канадски сектори, вклучувајќи ги металите и автомобилите.
Канадските трговски преговарачи се обидуваа да постигнат договор со кој барем дел од постојните американски царини би биле намалени.
„Ако овие царини стапат во сила, Канада треба да одговори со царина за царина, долар за долар“, напиша на Икс премиерот на Онтарио, Даг Форд, реагирајќи на најавата за новите царини.
Би-би-си наведува дека побарала коментар од Белата куќа и од канадската влада.
Претходно оваа година САД одлучија да не го обноват договорот УСМЦА во неговата сегашна форма.
Канада и Мексико бараа обновување на трговскиот договор, но САД сакаат да го изменат договорот што беше постигнат за време на првиот претседателски мандат на Трамп.
Во сегашната форма, договорот ќе продолжи да ја регулира трговијата во Северна Америка во наредната деценија, врз основа на систем на автоматско продолжување и задолжителни годишни ревизии.
Врховниот суд на САД во февруари ги поништи сеопфатните меѓународни царини што Трамп ги воведе врз основа на Законот за меѓународни економски овластувања во вонредни состојби од 1977 година.
Судиите заклучија дека претседателот ги пречекорил своите овластувања кога ги вовел царините врз основа на закон наменет за национални вонредни состојби.
Белата куќа тогаш вети дека ќе примени други механизми за воведување даноци на увозот.
Царините најавени во понеделникот се воведени врз основа на член 338 од Законот за царини од 1930 година, кој се однесува на трговска дискриминација, а не на национални вонредни состојби.
Кендис Леинг, претседателка на Канадската стопанска комора, најновите царини ги нарече „одлука за жалење“ и ги повика официјалните претставници да постигнат „значителен напредок“ во преговорите пред новите мерки да стапат во сила за 30 дена.
Крис Свонгер, претседател на Советот за дестилирани алкохолни пијалаци на САД, исто така ги повика двете страни да најдат решение, предупредувајќи дека оваа одлука „го зголемува ризикот од нови противмерки“.
