Летото е период кога кожата е изложена на зголемено сончево зрачење, високи температури и потење, поради што ѝ е потребна поинаква нега отколку во остатокот од годината. Сепак, многу луѓе несвесно прават грешки што можат да имаат долгорочни последици.
Една од најчестите грешки е користењето силни пилинзи и агресивни хемиски третмани непосредно пред или за време на изложување на сонце. По ваквите третмани кожата станува почувствителна, па ризикот од изгореници, црвенило и појава на темни дамки е поголем.
Стручњаците советуваат во текот на летото да се избегнуваат и третмани како што се хемиски пилинзи, ласерски процедури и микродермоабразија, освен ако дерматолог посебно не ги препорачал. Овие процедури можат да ја зголемат чувствителноста на кожата на УВ-зраците.
Уште една честа грешка е користењето производи со ретинол или силни киселини без соодветна заштита од сонце. Иако се ефикасни во негата на кожата, овие состојки можат да ја зголемат фотосензитивноста, па затоа е неопходно секојдневно да се користи крем со висок заштитен фактор.
Не се препорачува ниту стискање мозолчиња, особено во текот на топлите денови. Поради засиленото потење и присуството на бактерии, се зголемува ризикот од инфекции и појава на лузни.
Дерматолозите истакнуваат дека во лето е најдобро да се фокусирате на нежно чистење, добра хидратација и секојдневна заштита од сонце. Редовната употреба на производи со заштитен фактор, лесни хидратантни креми и антиоксиданси ќе помогне кожата да остане здрава и негувана.
Соодветната летна нега не вклучува повеќе производи, туку избегнување навики што можат да ја нарушат природната заштитна бариера на кожата.
