Франција и Шведска се приклучија на барањето на уште пет земји од Европската Унија што бараат санкции против Израел, со предложена забрана за трговија со производи од израелските населби, наведува ЕУобзервер, повикувајќи се на неформален предлог во кој имал увид – нацрт-писмо што Шведска го подготвила за утрешниот министерски состанок.
„Сепак, сметаме дека постојаното и брзо влошување на ситуацијата бара итна акција“, се додава во документот.
„И покрај тоа што се во јасно кршење на меѓународното право, населбите и насилството од страна на доселениците растат со рекордно темпо“, се наведува во француско-шведскиот предлог.
Двете земји изразија уверување дека „Европската Унија итно мора да го зголеми притисокот врз Израел да ја прекине својата политика и практика на населување“ на окупираните територии.
Според Гардијан, сè поголем број европски земји во последните недели бараат поостар пристап кон Израел, вклучително и можност за суспензија на делови од договорите меѓу Европската Унија и Израел или воведување економски мерки.
Истовремено, дипломатски извори наведуваат дека прашањето за санкции веќе подолго време се разгледува во Брисел, но останува отворено дали ќе се постигне едногласност меѓу сите земји членки, што е неопходно за нивно усвојување.
Европската Унија е најголемиот трговски партнер на Израел, па евентуалните санкции би имале значајни економски и политички последици. Аналитичарите оценуваат дека исходот од состанокот во Луксембург ќе биде клучен показател дали Унијата е подготвена да премине од дипломатски притисок кон конкретни мерки.
