Иако Кина и Русија одржаа серија заеднички воени вежби од почетокот на конфликтот во Украина во 2022 година, Пекинг постојано ја нагласува својата неутралност во војната, нудејќи се како посредник.
Со обуката на руски воен персонал на оперативно и тактичко ниво, кој потоа учествува во борбите во Украина, Кина е многу подиректно вклучена во војната на европска почва отколку што се знаеше претходно, изјавил неименуван разузнавачки службеник. Разузнавачките агенции побарале да останат анонимни поради чувствителноста на информациите.
Руското и кинеското министерство за одбрана не одговориле на барањата за коментар за деталите од овој напис, според Ројтерс.
„Во врска со украинската криза, Кина постојано одржува објективен и непристрасен став и се залага за мировни преговори, кои се цврсти и јасни и посведочени од меѓународната заедница“, соопшти кинеското Министерство за надворешни работи за Ројтерс. „Релевантните страни не треба намерно да поттикнуваат конфликт или да ја префрлаат вината“.
Европските сили, кои ја сметаат Русија за голема безбедносна закана, внимателно ги следат сè поцврстите врски меѓу Русија и Кина, втората најголема економија во светот и важен трговски партнер на Европската Унија.
Двете земји прогласија „безгранично“ стратешко партнерство само неколку дена пред почетокот на војната во Украина во 2022 година и се обврзаа на воени вежби за усогласување на своите вооружени сили. Додека Западот се обидува да ја изолира Русија, Кина ѝ обезбеди економски спас купувајќи нејзини нафта, гас и јаглен.
Кинескиот лидер Си Џинпинг му е домаќин на рускиот претседател Владимир Путин во денес и утре, помалку од една недела по посетата на американскиот претседател Доналд Трамп. Кина и Русија го претставија патувањето на Путин – неговото 25-то во Кина – како дополнителен доказ за нивното „партнерство на сите времиња“, дури и кога Западот бара од Пекинг да изврши притисок врз Москва да ја прекине војната во Украина.
Тајната обука, насочена првенствено кон употреба на беспилотни летала, е опишана во двојазичен руско-кинески договор потпишан на 2 јули 2025 година во Пекинг од страна на високи руски и кинески функционери.
Во договорот, во кој имал увид Ројтерс, се наведува дека околу 200 руски војници ќе поминат обука во воени објекти на локации, вклучувајќи ги Пекинг и источниот град Нанџинг. Изворите тврдат дека приближно ист број војници подоцна биле обучени во Кина.
Во договорот е предвидено и дека стотици кинески војници ќе поминат обука во воени објекти во Русија. Според договорот, Русите требало да бидат обучени во дисциплини како што се беспилотни летала, електронско војување, воена авијација и оклопна пешадија. Договорот забранува какво било медиумско известување за посетата во двете земји и наложува дека трети страни не треба да бидат информирани.
Дроновите се покажаа како клучно оружје во Украина. Двете страни користат модели со долг дострел за да напаѓаат цели оддалечени стотици километри, додека на бојното поле, помали далечински управувани беспилотни летала (ФПВ) вооружени со експлозиви доминираат во небото, што го прави движењето на оклопни возила или пешадија исклучително опасно.
Иако Русија има богато борбено искуство од Украина, огромната кинеска индустрија за беспилотни летала нуди технолошка експертиза и напредни методи за обука, како што се симулатори за летање, соопштија агенциите. Значителен број руски персонал обучен во Кина бил високо рангиран воен инструктор, способен да пренесува знаење понатаму во командниот синџир.
Една од агенциите го потврдила идентитетот на неколку руски војници обучени во Кина кои оттогаш директно учествувале во борбени операции со беспилотни летала во регионите Крим и Запорожје. Чиновите на тие лица се движеле од помлад водник до потполковник, соопшти агенцијата. Ројтерс не можел независно да го потврди нивното учество во војната.
Внатрешните руски воени извештаи во кои имал увид Ројтерс опишуваат четири курсеви за обука за руски војници во Кина. Еден извештај од декември 2025 година опишува комбиниран воен курс за околу 50 руски војници во огранокот Шиџиажуанг на Пешадиската академија на копнените сили. Курсот вклучувал обука за пукање со минофрлачи од 82 милиметри со употреба на беспилотни летала за лоцирање цели.
Друг извештај опишува обука за воздушна одбрана во воен објект, вклучувајќи електронски борбени оружја, уреди за фрлање мрежи и беспилотни летала за пресретнување на непријателски авиони. Двајца службеници изјавија дека објектот се наоѓа во Женгжу.
Трет извештај, датиран од декември 2025 година, опишува обука со беспилотни летала во Центарот за обука на военото воздухопловство Јибин. Курсот бил фокусиран на мултимедијални презентации и вклучувал употреба на симулатори. летање и обука за неколку видови ФПВ дронови.
Четвртиот извештај го опишува курсот од ноември 2025 година на Универзитетот за воено инженерство во Нанџинг. Обуката вклучувала технологија за експлозиви, поставување и отстранување на мини, како и отстранување на неексплодирани боеви средства и импровизирани експлозивни направи.
Извештајот вклучувал и фотографии од руски војници во униформа обучувани од кинески инструктори, како и слики што им ја прикажуваат инженерската опрема и методите за пребарување на теренот за мини.
