Претставничкиот дом и Сенатот гласаа различно за предлозите со кои требаше да се ограничи воената кампања. Демократите во Претставничкиот дом, со поддршка од неколку републиканци, по вторпат успеаја да усвојат резолуција со која се прекорува Трамп поради војната. Само неколку часа подоцна, републиканското мнозинство во Сенатот блокираше слична иницијатива, бидејќи демократите не обезбедија доволно гласови.
Различните исходи од гласањето ги покажуваат тешкотиите со кои се соочуваат пратениците во обидите да го ограничат Трамп и да му стават крај на речиси петмесечниот конфликт.
Гласањето во Претставничкиот дом е уште еден показател дека сѐ повеќе законодавци се незадоволни од војната, особено по застојот на мировните преговори и неодамнешната ескалација на борбите, во кои минатиот викенд загинаа четворица американски војници на Блискиот Исток. Истовремено, републиканците се обидуваат да го задржат тесното мнозинство во Домот пред ноемвриските избори.
Од друга страна, неуспехот во Сенатот покажува колку е тешко демократите, но и дел од републиканците, да обезбедат политичка поддршка за завршување на конфликтот. И Претставничкиот дом и Сенатот уште во јуни усвоија резолуции за запирање на војната, но Трамп ги игнорираше и се очекува повторно да постапи исто.
Овие резолуции немаат обврзувачка правна сила и главно имаат симболично значење. Резолуцијата на Претставничкиот дом не оди на потпис кај претседателот, а Трамп речиси сигурно би ставил вето на секој закон што би ги ограничил неговите овластувања.
Во Претставничкиот дом, четворица републиканци гласаа заедно со демократите, па резолуцијата беше усвоена со 214 гласа „за“ и 208 „против“.
Во Сенатот, пак, предлогот на демократскиот сенатор Крис Ван Холен беше одбиен со 47 гласа „за“ и 49 „против“. Единствената републиканка што ја поддржа иницијативата беше Сузан Колинс од Мејн, додека демократот Џон Фетерман гласаше против. Републиканците Ренд Пол и Лиса Мурковски, кои претходно поддржаа слични мерки, не учествуваа во гласањето.
Демократите оценија дека гласањето во Претставничкиот дом покажува дека можат да привлечат доволно републикански гласови за да му нанесат политички удар на Трамп. Тие сметаат дека резолуциите за воени овластувања се едно од ретките средства со кои можат да ги принудат републиканците јавно да се изјаснат за непопуларниот конфликт, особено во услови кога постои ризик Републиканската партија да биде обвинета за високите цени на горивата пред изборите.
„Ќе продолжиме да вршиме притисок врз претседателот да ја запре оваа војна“, изјави демократската конгресменка Прамила Џајапал, авторка на резолуцијата. Таа додаде дека очекува републиканците да застанат во одбрана на Уставот, сопствената совест и интересите на своите избирачи.
Војната, започната во февруари од САД и Израел, сега е во својот петти месец и засега нема знаци дека наскоро ќе заврши. Примирјето прогласено во април пропадна претходно овој месец, кога САД и Иран повторно разменија напади, а Трамп повторно воведе поморска блокада на иранските пристаништа.
Белата куќа тврдеше дека примирјето го прекинало рокот од 60 дена во кој, според Законот за воени овластувања, претседателот треба да добие одобрение од Конгресот за продолжување на воените дејствија. Минатата недела Трамп повторно го извести Конгресот дека САД повторно се во војна со Иран, со што, според администрацијата, започнал нов рок од 60 дена.
Критичарите, пак, сметаат дека администрацијата погрешно го толкува законот, бидејќи американските сили, преку поморската блокада, продолжиле со воени активности и за време на примирјето.
И покрај неколкуте републикански отстапувања, најголем дел од партијата остана на страната на Трамп.
„Неколку републиканци ни се придружија, но мнозинството не ја послуша ниту својата совест ниту своите избирачи и повторно гласа за трошење милијарди долари за оваа војна“, изјави демократскиот конгресмен Грег Касар.
Претседателот на Комитетот за надворешни работи на Претставничкиот дом, републиканецот Брајан Маст, оцени дека гласањето покажува оти дел од пратениците „немаат никакво разбирање“ за жртвата на американските војници и за нападите што Иран ги извршува во регионот.
