„Претседателот Трамп се сврте кон него и кажа: „Почекај малку. Велиш дека не можеш да имаш избори ако се води војна?“ Тој го кажа тоа како шега, но во исто време, познавајќи го претседателот Трамп, си помислив – знам дека го кажа тоа како шега, но не сум сигурен дали се шегува“, кажа Грин.
Трамп не ги употреби токму тие зборови, туку во август минатата година му кажа на Зеленски: „Значи, велите дека за време на војна не можете да имате избори. Ќе ви кажам, за три и пол години, ако сме во војна со некого, нема да има повеќе избори…“
По руската инвазија во февруари 2022 година, во Украина беше воведена воена состојба, која беше продолжена неколку пати од тогаш. Според украинскиот устав, национални избори не можат законски да се одржат за време на воена состојба. Претседателски избори во Украина требаше да се одржат пролетта 2024 година.
Грин кажа дека Трамп сака да ја нормализира таа идеја во очите на јавноста со вакви изјави. „Тој постојано ја повторува за да ја нормализира идејата, да ја тестира поддршката и да ги тестира реакциите на луѓето“, оцени таа. „Мислам дека е неверојатно опасно и никој никогаш не треба да го прифати.“
Таа додаде: „Не може да има трет мандат, не. Тоа е против нашиот закон, против Уставот, нема трет мандат. И ако земјата е во војна, не – нашите избори не смеат да бидат откажани.“
Грин поднесе оставка од Конгресот во јануари откако се скара со Трамп и движењето „Да ја направиме Америка повторно голема – МАГА“.
22-от амандман на Уставот на САД наведува дека никој не може да биде избран за претседател повеќе од двапати. И покрај ова, откако се врати во Белата куќа, Трамп постојано спомнува останување на функцијата и трет мандат, иако честопати зборува и за тоа кој ќе го наследи, при што изборот наводно паднал на потпретседателот Џеј Ди Венс и државниот секретар Марко Рубио.
По преземањето на функцијата во јануари 2025 година, претседателот кажа на собир во Лас Вегас дека „ќе му биде најголема чест во животот да служи, не еднаш, туку двапати – или три пати или четири пати“, додавајќи на аплаузот од публиката дека сепак ќе служи само двапати. Неколку дена подоцна, на 27 јануари, на републиканската конвенција во Флорида, тој се пошегува: „Не сум сигурен. Дали ми е дозволено повторно да се кандидирам?“
На Националниот молитвен појадок на 6 февруари 2025 година, тој ги праша поддржувачите дали треба повторно да се кандидира, на што тие почнаа да скандираат „уште четири години“. Еден месец подоцна, во интервју за Ен-би-си, тој изјави дека не се шегува за трет мандат и дека на многу од неговите поддржувачи би им се допаднало тоа. „Постојат методи со кои би можеле да го постигнете тоа“, рече тој, додавајќи дека е „прерано да се размислува за тоа“.
Набрзо потоа, тој им кажа на новинарите во Овалната канцеларија: „Луѓето ме молат да се кандидирам. Постои целата приказна за кандидирање за трет мандат. Не знам. Никогаш не сум го истражил тоа. Велат дека постои начин да го направите тоа, но јас не знам ништо за тоа“. Во друго интервју за Ен-би-си на 2 мај 2025 година, тој повтори дека „толку многу луѓе“ сакаат тој да отслужи трет мандат. На крајот на октомври истата година, тој изјави дека би „сакал“ трет мандат, а неколку дена подоцна призна дека Уставот е „сосема јасен“ во врска со забраната, коментирајќи „штета“.
Трамп би можел да остане на власт трет мандат само ако го убеди Конгресот да го измени Уставот. За тоа, ќе му треба двотретинско мнозинство и во Претставничкиот дом и во Сенатот, што е малку веројатен политички потфат. Дури и ако успее, амандманот потоа ќе мора да биде ратификуван од три четвртини од американските федерални држави.
„Тоа не е само ризик, туку е веројатно дека тој ќе биде републиканскиот кандидат, освен ако не се случи нешто непредвидено со неговото здравје или нешто слично“, изјави претходно Кимберли Вел, професорка по право на Универзитетот во Балтимор.
„22-от амандман не се спроведува автоматски, што значи дека мора да се примени за да биде на сила. Секоја држава одлучува кој ќе биде на нејзиното претседателско гласачко ливче, а не федералната влада“, објасни таа. „На крајот на краиштата, партијата е таа што номинира. Ако доволен број држави го стават на гласачкото ливче, Републиканската партија очигледно ќе го номинира – досега тие не се спротивставија на неговите нелегални постапки, па затоа не може да се очекува да го приоритизираат 22-от амандман пред него“.
Откако влезе во Конгресот на почетокот на 2021 година, Марџори Тејлор Грин стана една од најжестоките поддржувачи на Доналд Трамп, дури и бранејќи ги неговите постапки поврзани со нападот врз Капитол на 6 јануари. Сепак, проблемите што тлеат околу односите меѓу САД-и со Израел и конфликтот со Иран кулминираше со објавување на досиејата на Епстин, при што Грин ја нападна неподготвеноста на Трамп целосно да ги објави сите документи. Таа, исто така, ги критикуваше тактиките на републиканците за време на неколку неодамнешни блокади на владата и вмешаноста на Трамп во странски конфликти што вклучуваат огромна финансиска и воена помош. Во април, во интервју со Алекс Џонс, таа кажа дека смета дека Републиканската партија треба да биде „срушена до темел“.
На почетокот на април пратеникот од Калифорнија Ро Кана, и Грин на социјалните мрежи изразија поддршка на нова популистичка коалиција која би ги промовирала интересите на американските работници. Кана, демократ, и Грин ја критикуваа војната во Иран. Кана во видео на социјалната мрежа Икс кажа дека му „олеснало“ што претседателот Трамп го прифатил прекинот на огнот.
„Но, да бидеме јасни, тоа не се случи благодарение на Конгресот, кој едвај пушти глас. Се случи благодарение на силата на американскиот народ. Не само прогресивците и либералите, туку и конзервативците како Такер Карлсон, Марџори Тејлор Грин, па дури и Ен Колтер, го кренаа својот глас против ужасот од заканата од геноцид врз друг народ“, кажа Кана.
Грин одговори: „Ро, се согласувам со тебе дека ни е потребна силна популистичка коалиција од десницата и левицата што може да се обедини по најважните прашања за идните генерации Американци“.
