Полицијата соопшти дека наводите се однесуваат на периодот од 1980-тите и 1990-тите години, при што еден случај се случил во Сари, додека обвинувањата што се однесуваат на Беркшир се поврзани со имот во Виндзор, пренесува Гардијан.
Како што се наведува, полицијата се обидува да најде докази што би ги потврдиле или побиле овие тврдења и веќе разговарала со наводните жртви.
Во соопштението на полицијата во Сари, која ја покрива областа јужно од Лондон, се наведува:
„По објавувањето на досиејата што се однесуваат на Џефри Епстин од страна на американското Министерство за правда, истражуваме два одвоени наводи за сексуално злоставување деца од минатото. Едната пријава се однесува на локации во Сари и Беркшир од средината на 1990-тите до 2000 година. Втората се однесува на периодот од средината до крајот на 1980-тите во западен Сари.“
Според сознанијата на Гардијан, засега ниту еден потенцијален осомничен не бил испрашан и немало апсења.
Полицијата неколку месеци разгледувала дали е потребна кривична истрага, откако материјалот објавен во досиејата за Епстин во декември 2025 година стана достапен.
Во февруари полицијата ги повика сведоците да се јават и наведе:
„По објавувањето на досиејата за Епстин од страна на американското Министерство за правда во декември 2025 година, полицијата во Сари дозна за редактиран извештај во кој се наведува трговија со луѓе и сексуални напади врз малолетно лице во Вирџинија Вотер, во Сари, меѓу 1994 и 1996 година. По проверката на нашите системи, со ограничените информации што ни беа достапни, не најдовме докази дека наводите поврзани со Сари биле пријавени во полицијата во Сари.“
Публицитетот околу обвинувањата довел до тоа луѓе да се јават и да тврдат дека имаат информации.
Полицијата во Сари во февруари соопшти:
„Примивме неколку пријави како резултат на повикот до сведоци, кои во моментов ги разгледуваме.“
Гардијан дознава дека две од тие пријави ги поднеле жени што рекле дека се жртви спомнати во досиејата за Епстин.
По земањето изјави, полицијата во Сари соопшти дека почнува кривична истрага.
Истрагата ја водат специјалисти за злоставување деца од тимот за заштита на јавноста во рамките на полицијата.
Документите што се однесуваат на Епстин, како и на неговите соработници, се објавени на страницата на американското Министерство за правда.
Полицијата во Сари е третата британска полициска служба што води кривична истрага по откритијата од досиејата за Епстин.
Ова е првата кривична истрага на британската полиција што се однесува на наводи за сексуално злоставување жени поврзани со Епстин, за кого се тврди дека тргувал со жени и девојчиња и ги носел кај своите моќни соработници.
Досегашните две кривични истраги се однесувале на наводни кривични дела против државата.
Поранешниот принц Ендрју Маунтбатен-Виндзор и поранешниот министер во владата Питер Менделсон биле уапсени под сомнение за злоупотреба на службената положба, поради наводно откривање чувствителни информации на Епстин, до кои дошле во рамките на своите службени функции.
И двајцата негираат каква било вина.
Братот на кралот Чарлс се наоѓа под истрага на полицијата на Темза Вали, додека поранешниот министер и поранешен амбасадор во Вашингтон е под истрага на Метрополитен полицијата.
Шест полициски служби разгледуваат дали да почнат кривични истраги во врска со летови што пристигнувале во Обединетото Кралство, за кои се тврди дека биле организирани по барање на Епстин и дека превезувале жени што биле жртви на трговија со луѓе.
Британската полиција стравува дека обвинителите нема да сакаат да покренат обвиненија, освен ако администрацијата на Доналд Трамп не се согласи да ги предаде оригиналните документи од досиејата за Епстин.
Засега на страницата на американското Министерство за правда се објавени редактирани документи што се однесуваат на Епстин и неговите соработници.
Американското Министерство за правда ѝ соопштило на британската полиција дека нема да разгледува предавање на оригиналните документи без официјално барање, што е бирократски и долг процес.
