Во периодот од 2020 до 2025 година, штетите од поплавите во Европа изнесуваа 88,6 милијарди евра и беа за речиси 20 проценти повисоки отколку во претходните десет години, пресмета Алијанс трејд. Износот е исто така за 40 проценти поголем отколку во првата деценија од овој век, покажуваат нивните пресметки.
Поголемиот износ на штета не е резултат на поголем број поплави, откри Алијанс трејд, истакнувајќи дека од 2000 година, Европа регистрирала околу 50 поплави годишно. Поплавите станаа значително поразорни, објаснуваат тие, наведувајќи го примерот со катастрофалната поплава во германската долина Ар во 2021 година.
Поголемата штета е поврзана и со фактот дека во областите склони кон поплави сè уште интензивно се гради и економијата се развива, па затоа поплавите денес уништуваат значително повеќе имот отколку пред две децении, според извештајот „Европа под вода“. Владите можат да одредат каде ќе се градат станбени и комерцијални згради и со тоа да ја ублажат изложеноста на ризик од поплави.
Поплавите не само што предизвикуваат непосредна материјална штета, туку можат да ја забават и економијата на долг рок, предупреди Мило Богартс, раководител на Алијанс трејд за Германија. Последиците се послаби инвестиции, пониски приходи и побавен економски раст, додаде Богартс.
Според проценките на Алијанс трејд, голема поплава во Германија би можела да го намали бруто домашниот производ за околу 0,7 проценти во текот на неколку години.
Затоа, инвестициите во заштита од поплави треба да бидат повисоки, предлага Алијанс трејд, со проценка дека секое инвестирано евро би можело да спречи штета од околу четири евра.
