Одговарајќи на прашања од новинари пред оградениот дел од Пионирски парк, таканаречениот Чациленд, Брнабиќ кажа дека на протестот не бил презентиран никаков план, програма или идеја. „Дали сме слушнале нешто ново за план? Не сме. Дали сме слушнале за програма? Не сме. За некоја идеја? Не сме. Што би направиле за Србија? Не сме слушнале ништо. Само нека помине сè мирно“, кажа таа.
„За мене е неверојатно лицемерието и парадоксот што го гледаме на денешниот протест. Имате луѓе кои зборуваат за слобода на медиумите, но ги напаѓаат сите медиуми што не им се допаѓаат. Имате луѓе кои зборуваат за правда, но прават сè за да ја спречат вистината за тоа како студентка на Филозофскиот факултет го загубила животот“, продолжи Брнабиќ.
Таа додаде дека на протестот зборувале за одговорност и „никој, ниту деканот ниту ректорот, не помислиле да поднесат оставка“. „Имате луѓе кои тврдат дека се грижат за студентите и им ги зголемуваат школарините. Кога студентите побараа 50 проценти пониски школарини, тие им рекоа дека е можно, но само ако државата им ги врати тие пари, бидејќи нема да се откажат од ниту еден динар. А потоа, откако им одзедоа една година од животот, ги зголемија и школарините“, изјави таа.
На прашањето што се слави во оградениот дел од Пионирски парк, таа одговори дека се слави „победата над обоената револуција“. Таа кажа дека се собрале затоа што „сакаат да бидат заедно“ и покажуваат дека не сакаат насилство ниту владата да се менува на улица.
Таа нагласи и дека голем број луѓе се собрале „за да го поддржат претседателот Александар Вучиќ кој оди во Кина“ во она што таа го нарече историска посета „која ќе донесе многу добри работи“.
„Луѓето уживаат во убавото време, уживаат во својот град“, кажа Брнабиќ, опишувајќи го собирот како „прослава на демократијата“.
Брнабиќ тврди дека единственото насилство што било видено било „насилство од страна на демонстрантите“. „Видовте две Србии и видовте која од нив не е насилна“, додаде таа.
Претседателката на српското собрание не одговори на новинарско прашање зошто на сите медиумски екипи не им било дозволено да влезат во оградената област во близина на Пионирски парк.
