Зборувајќи на годишната конференција за копнено војување во Лондон, началникот на Генералштабот на британската армија кажа дека секој воен одговор на агресор мора да следи веднаш, идеално пред непријателските сили дури и да успеат да ги напуштат своите места за собирање.
„Ако одвраќањето не успее, цената што му ја наметнуваме на агресорот мора веднаш да се почувствува, по можност пред да ги напуштат своите места за собирање“, кажа поранешниот офицер на специјалните сили.
Тој откри и планови за распоредување „значително повеќе далечински и автономни системи на источното крило“ во текот на следната година, како дел од напорите на НАТО за зајакнување на одбранбените позиции. Британските војници веќе се во Естонија како дел од мисијата за зголемено присуство на НАТО.
Генералот Вокер нагласи дека Британија мора да остане подготвена да ги ризикува животите на своите војници во одбрана на сопствените интереси и интересите на своите сојузници. „Суровата вистина е дека крвта е најскапоцената валута во која можеме да инвестираме“, кажа началникот на британската војска.
Според него, воената и моралната подготвеност на државата да испраќа војници на фронтовската линија го поддржува нејзиното меѓународно влијание и кредибилитет. „Таа купува влијание, го изострува кредибилитетот и на крајот дава тежина на обликувањето на начинот на кој се води конфликтот, како и на мирот што следи“, додаде Вокер.
Неговото предупредување доаѓа во време кога британското Министерство за одбрана се соочува со буџетска дупка од дури 28 милијарди фунти, и покрај сегашните конфликти во Иран и Украина. Претходно овој месец, поранешниот министер за одбрана Џон Хили и министерот за оружени сили Ал Карнес поднесоа оставки поради спор околу военото финансирање, додека долгонајавуваниот План за инвестиции во одбраната на Владата останува необјавен, со повеќе од една година задоцнување.
Сепак, генералот Вокер инсистира дека копнената моќ останува клучна за спречување на конфликти и одржување на безбедноста. Тој моментално командува со војска од околу 70.000 обучени лица, најмалата големина на британската војска во последните 200 години, и се очекува тие да го понесат товарот на новите намалувања кога конечно ќе биде претставен Планот за инвестиции во одбраната.
Нагласувајќи ја трајната важност на копнените сили, Вокер кажа: „Само копнените сили можат да заземат територија и само копнените сили можат да држат позиции. Кога оружјето ќе замолчи, а сигурно ќе замолчи, копнените сили се тие што генерално остануваат во голем број за да го чуваат она што е освоено. Кога сите други ќе се вратат дома, копнените сили остануваат, а во многу случаи низ нашата историја, тоа станува наш нов дом“.
Заканите на Вокер доаѓаат во време кога истакнати личности во руските државни медиуми ја заострија својата реторика против официјален Лондон. Причината се извештаите дека Британија развила три нови прототипови на ракети со долг дострел за Украина. Тие системи, способни да погодат цели на растојанија од над 500 километри, наводно биле тестирани на полигонот Хебриди во Шкотска, а британските власти се надеваат дека првите испораки во Киев ќе почнат во текот на следната година.
Развојот на новото оружје предизвика жестока реакција кај поддржувачите на Кремљ, вклучувајќи ја и Маргарита Симонјан, раководителка на руските државни медиуми и блиска сојузничка на рускиот претседател Владимир Путин. Појавувајќи се на руската државна телевизија, Симонјан ги коментираше британските планови.
„Кога Лондон безгрижно изјавува дека во моментов подготвува ракети со долг дострел за напад врз Москва – па, слушајте, таму во Лондон има неколку интересни кули. Би било интересно да се види како тие кули исчезнуваат во пламен. Веројатно би била доста живописна и убава глетка“, кажа Симонјан и посочи дека оваа напната врска на крајот би можела да заврши со тоа што Русија ќе издаде „ултиматум“ до Британија. „Тие се учесници во оваа војна. Ве поканувам да не бидете вознемирени што ова сè уште не е направено“, им порача таа на гледачите.
Нејзините закани следеа по бранот украински напади со британско оружје за време на викендот врз складишта за нафта и гориво кои ги поддржуваат руските воени операции. Голем пожар избувна во пристаништето Керч на Крим, при што се крена облак од црн чад долг повеќе од 60 километри.
Според гувернерот во тие напади се убиени пет лица, додека 28 се ранети. Киев неодамна ги засили нападите со беспилотни летала врз цели во Русија наводно со цел да ја принуди Москва на мировни преговори.
