Андора е една од најмалите држави во светот, сместена во срцето на Пиринеите, помеѓу Франција и Шпанија. Официјално е кнежевство со кое заеднички управуваат претседателот на Франција и бискупот од Урхел. Има површина од само 468 квадратни километри и практично може да се прошета пеш.
Андора – земја без криминал
Андора официјално нема постојана професионална војска. Нејзината одбрана законски и историски е доверена на соседните Франција и Шпанија. Тоа е дефинирано со договори, а и самите шефови на државата Андора всушност се претседателот на Франција и католичкиот бискуп од Урхел (Шпанија).
Во случај на вонредна состојба или војна, мажите можат да бидат повикани, но во пракса за редот и мирот се грижи исклучиво нивната национална полиција.
Кога ќе се спомене Андора, една од првите работи е тоа дека таму нема криминал. Тоа е речиси целосно точно, бидејќи Андора е една од најбезбедните земји во светот. Стапката на убиства со години е нула или се случува едно убиство на неколку години, најчесто семеен инцидент.
Уличен криминал, грабежи, џепчии и вандализам практично не постојат. Можете да шетате со скап часовник во кое било време од ноќта и да се чувствувате целосно безбедно.
Главните криминални проблеми со кои се соочува нивната полиција се финансискиот криминал, односно перењето пари, поради специфичниот банкарски систем, како и повремени провали во викенд куќи за време на скијачката сезона.
Андора има еден модерен затвор кој обично има многу мал број затвореници (во просек помеѓу 40 и 60 лица), што е за држава од околу 85.000 жители исклучително малку.
Интересно е што големото мнозинство затвореници всушност се странци, повеќе од 80 проценти, најчесто фатени во криумчарење. Значи, затвор постои, но е полупразен.
Фантастичен животен стандард
Кога станува збор за стандардот, тој во Андора е навистина висок. Оваа земја со децении беше класичен даночен рај. Иако под притисок од ЕУ воведоа данок на доход и данок на добивка за компаниите, тој е ограничен на максимум 10 проценти. Данокот на додадена вредност изнесува само 4,5 проценти, што е најниско во Европа.
Според податоците на Светската здравствена организација, Андора редовно се наоѓа меѓу трите земји со најдолг животен век во светот, со просек од над 83-84 години. Нивниот здравствен систем се смета за еден од најефикасните на глобално ниво.
Сепак, трошоците за живот се високи.
За стандардот да биде фантастичен, треба да имате сериозен приход. Недвижностите се исклучително скапи (и за купување и за изнајмување) бидејќи просторот меѓу Пиринеите е географски ограничен.
