И покрај сè поголемата популарност на пливањето во ладна вода и потопувањето во ледена вода, постојат само ограничени податоци за здравствените придобивки од изложувањето на студ. Сепак, студија што опфатила 47 возрасни лица со дебелина или прекумерна телесна тежина открива дека редовното изложување на ниски температури доведува до губење масти.
Истражувачи од Универзитетот во Нотингем и Медицинскиот центар на Универзитетот Лајден им дале на половина од учесниците леден елек и појас за половината да ги носат два часа секое утро додека ги извршуваат секојдневните обврски.
Елеците и појасот се носеле врз тенка маица со кратки ракави и содржеле разладни патрони наполнети со гел, кои преку ноќ биле чувани во замрзнувач, а одржувале температура од 15 Целзиусови степени.
За шест недели, учесниците изгубиле 0,9 килограми, речиси целосно од телесните масти, додека контролната група не изгубила тежина и се здебелила во просек за 0,6 килограми.
„Ова е една од првите студии што го испитуваат влијанието на изложувањето на студ во подолг временски период, а која вклучува лица со прекумерна тежина и дебелина“, велат истражувачите. „Елеци како овој можат да се носат дома и така изложувањето на студ би можело да биде едноставен и евтин додаток на стратегиите за губење тежина, како што се здравата исхрана и физичката активност.“
Студијата, презентирана на Европскиот конгрес за дебелина во Истанбул, заклучува дека ниските температури би можеле да помогнат во забрзувањето на темпото со кое телото согорува калории.
„Секојдневното изложување на студ активира кафеава маст, користејќи ги резервите на телесни масти за производство на топлина. Можно е носењето елек за ладење да ги тренира кафеавите масти да бидат поактивни и да има здрав ефект врз липидите, гликозата и воспаленијата во организмот. Сето ова делува како превентивна мерка за кардиоваскуларни заболувања“, велат авторите.
Истражувачите, заеднички финансирани од Холандската фондација за срце и Британската фондација за срце, истражуваат дали други облици на редовно изложување на студ би можеле да ја намалат дебелината и воспалението и да спречат срцеви заболувања.
Авторите спроведуваат посебна студија со 34 жени во Холандија за да утврдат дали туширањето со ладна вода исто така го поттикнува губењето на мастите. „Нашата хипотеза е дека туширањето со ладна вода и пливањето во ладна вода би можеле да имаат ист ефект“, иако пливањето во ладна вода не е директно споредливо бидејќи „постојат многу други фактори кои играат улога, како што е студениот шок – скокањето во езеро би имало различни ефекти врз организмот“.
„Елекот за ладење претставува многу подолг период на изложеност отколку туширањето. Сепак, од друга страна, ладниот туш е многу постуден. Треба да видиме дали тоа има влијание врз губењето на тежината“, велат истражувачите. „Се надеваме дека луѓето ќе можат да најдат метод на изложеност на студ што им одговара и се вклопува во нивната дневна рутина.“
