Средбата, како што соопшти Министерството за внатрешни работи, се одржала во рамки на проектот EU4FAST и била фокусирана на заеднички приоритети како што се тероризмот, организираниот и транснационалниот криминал, илегалната миграција, киберкриминалот, криминалот поврзан со криптовалути и криптопазари, како и превенцијата од интернет-криминал.
Од МВР информираат дека на состанокот била потврдена подготвеноста за интензивирање на размената на информации, податоци и оперативни искуства поврзани со криминалните активности на поединци и организирани криминални групи, со цел поефикасно откривање, спречување и сузбивање на сите форми на криминал.
Посебен акцент бил ставен и на идните заеднички проекти во областа на обуки, тренинзи, едукација и размена на знаења и добри практики, особено во борбата против тероризмот, киберкриминалот, илегалната миграција и злоупотребите поврзани со криптовалутите, како и на примена на современи аналитички методи и алатки во полициското работење.
Во духот на меѓусебната доверба и партнерство, било потврдено и воспоставување на поцврста институционална рамка на соработка преку подготовка на меморандум или протокол, со јасно дефинирани директни контакт-точки за секоја област од заеднички интерес. Со тоа, како што наведуваат од МВР, ќе се овозможи побрза комуникација и поефикасна координација.
Од МВР додаваат дека била потврдена и подготвеноста за развивање заеднички регионални иницијативи, имајќи предвид дека безбедносните предизвици денес не познаваат граници и бараат координиран и партнерски пристап.
Македонската и италијанската полиција, како што се наведува, остануваат доверливи партнери кои преку соработка придонесуваат за унапредување на националната, регионалната и глобалната безбедност.
