Димитриевски уште обвини дека додека Мицкоски го штити министерот за земјоделство, Цветан Трипуновски сточарите се во тешка криза.
„Сточарството буквално се распаѓа. Откупот е намален и со понижувачка откупна цена од едвај дваесетина денари за литар млеко. Во исто време, цените на млекото и млечните производи во маркетите растат. Некој прави огромни профити врз грбот на земјоделците“, рече Димитриевски.
Дополнително, кажа тој, доцнат субвенциите за добиток и премиите за млеко и праша каде се парите за земјоделците.
„СДСМ бара итна интервенција за обезбедување непречен откуп на млекото и посебна мерка за поддршка на производителите на кравјо млеко преку интервентната програма. Ова што се случува е недозволиво! Мицкоски го уништи земјоделството. Субвенциите се намалени за 40 милиони евра, откупот е намален за 46 проценти, а земјоделците се оставени без заштита и без перспектива. Хаосот е насекаде – кај сточарите, градинарите, оризопроизводителите, овоштарите и пчеларите. Сите се соочуваат со исти проблеми, ниски откупни цени, неисплатени субвенции и несигурен пласман. Го прашуваме Мицкоски зошто нема мерки за млекото, оризот, доматот и пиперката? Зошто доцнат субвенциите? Затоа што, како што рековме нема пари во буџетот за земјоделците заради криминални тендери“, обвини Димитриевски на денешната прес-конференција.
Поради сето ова, Димитриевски од името на СДСМ побара, итна интервенција за обезбедување непречен откуп на млекото.
