Во СВР Скопје, 38-годишен жител на Пробиштип пријавил дека непосредно пред полноќ на подрачјето на Центар бил физички нападнат од три машки лица. Според пријавата, напаѓачите му одзеле велосипед и паричник во кој имало пари и лични документи. Полицијата презема мерки за расчистување на случајот.
Во Штип, 20-годишен жител на општина Карбинци пријавил дека на паркинг-простор во градот бил физички нападнат од едно лице, кое му ги одзело прехранбените производи што претходно ги купил. За случајот е известен јавен обвинител од Основното јавно обвинителство Штип, а во тек се активности за пронаоѓање на сторителот.
Во уште еден инцидент во Штип, во семејниот дом на 62-годишна жена влегло лице кое ја нападнало со метален предмет и ѝ одзело накит. За настанот е известен јавен обвинител, а надлежните институции работат на целосно расчистување на случајот и откривање на сторителот.
Од Министерството за внатрешни работи информираат дека се преземаат сите неопходни мерки и активности за расветлување на трите случаи.
