Николовски вели дека искуството покажа дека функционерите незаконски стекнатиот имот го препишуваат на други лица, а по завршувањето на функцијата си го враќаат на свое име, па затоа се поставени и временски одредници во драфт верзијата на законот.
„Овој закон преку граѓанска постапка за конфискација, која ја воведуваме, ќе важи за сите лица кои нема да можат во одреден законски период да го докажат потеклото на имотот. Значи ќе важи за сите лица, не само за функционерите. Постапката ќе биде граѓанска, брза, а не кривична и ќе има соодветен праг кој моментално во драфт верзијата е поставен на 30 илјади евра“, рече Николовски во обраќањето на конференцијата што ја организираше УНДП и Министерството за финансии на тема детектирање и намалување на сивата економија.
