Одговорајќи на новинарско прашање за тоа како се одвива спроведувањето на реформската агенда и каков е неговиот став во врска со обвинувањата од страна на опозицијата за нејзино неспроведување, Мицкоски нагласи дека Владата ќе испорача сѐ што вети, освен два чекора – барањето да не обезбедува 100 отсто електрична енергија од снабдувачот и Изборниот законик.
„Опозицијата не се бори на следните избори да победи, туку се бори ова раководство да остане во опозиција. Во оваа насока е и шпекулацијата поврзана со застој во реализацијата на реформската агенда. Вчера имавме состанок, долг состанок со ресорните министри кои треба до крајот на јуни да ги доиспорачаат веќе почнатите чекори. Сите десет што се заостанати, со исклучок на два, нема да бидат испорачани. Првиот е оној во кој се бара од државата да не обезбедува 100 отсто електрична енергија за домаќинствата и за сите оние корисници од снабдувачот, бидејќи цениме дека тоа што го прифатила претходната влада ако ние го продолжиме и го прифатиме, тогаш сметките за електрична енергија на домаќинствата ќе бидат за 25 до 30, па и повеќе проценти поскапи. И тука свесно нема да одиме во реализација на тој чекор, бидејќи сакаме да го заштитиме стандардот на граѓаните. Вториот чекор е Изборниот законик. Знаете дека тој се носи со консензус. СДСМ ја напушти работата на групата што работи на Изборниот законик и сѐ додека е така, ние Изборниот законик не можеме да го донесеме, бидејќи тоа е еден од оние закони кои се во групата во која е потребен консензус во рамки на Собранието. Сѐ останато ќе биде завршено и сѐ останато ќе биде уште еден демант на лагите што ги испраќа СДСМ на дневните прес-конференции“, потенцира Мицкоски.
