Експертите предупредуваат дека продолженото седење може да го зголеми ризикот од прекумерна тежина, како и од развој на срцеви заболувања и дијабетес тип 2.
Иако знаеме дека паузите од екранот се корисни, помалку е јасно колку често треба да стануваме и да се движиме, а притоа да останеме продуктивни на работа.
Ново истражување објавено во Британскиот журнал за спортска медицина покажа дека петминутните паузи за движење, таканаречените „закуски за движење“, на секој час се најдобриот и најизводливиот начин за подобрување на благосостојбата без губење на ефикасноста.
Подобрување на продуктивноста, расположението и будноста
Главниот истражувач Кит Дијаз изјави за Би-би-си дека повеќето возрасни денес поминуваат дури три четвртини од времето кога се будни седејќи.
Иако општиот совет „седете помалку и движете се повеќе“ е точен, на луѓето им се потребни поконкретни упатства за тоа колку движење е доволно, додаде тој.
„Добрата вест е дека петминутна прошетка на секој час е доволна за подобрување на расположението и намалување на заморот. Испитаниците го оценија овој пристап како реалистичен и лесно остварлив“, рече Дијаз.
Истражувањето на Универзитетот Колумбија опфатило повеќе од 11.000 вработени во Соединетите Американски Држави, од кои повеќето работеле канцелариски работи во смени од осум до девет часа.
Во текот на првата недела учесниците се придржувале до својата вообичаена рутина и секојдневно пополнувале прашалници за заморот, расположението и работниот учинок.
Во текот на следните две недели, од нив било побарано да прошетаат по пет минути на секој половина час, час или два часа за време на работата, а потоа да пополнат слични прашалници.
Прошетката на секој половина час позитивно влијаела врз расположението и намалувањето на заморот, но истовремено ги нарушувала работните обврски. Прошетката на секои два часа била подобра отколку целосното отсуство на движење, но истражувачите утврдиле дека петминутната прошетка секој час донела најголемо и најлесно остварливо подобрување на продуктивноста, расположението и будноста.
Дијаз наведе дека долготрајното седење е навика што тешко се менува, а многу учесници во истражувањето биле загрижени што ќе помислат нивните претпоставени или колеги за честите паузи.
„Иако може да изгледа нелогично, паузите за движење всушност можат да ги подобрат работните перформанси. Тие можат да ги унапредат извршните когнитивни функции, вниманието и помнењето. Исто така, им помагаат на луѓето да се чувствуваат поопуштено и посвежо“, рече Дијаз.
Пешачењето е евтина и едноставна активност што не мора да значи прекин на работата, додаде тој, наведувајќи ги како пример состаноците во движење или пешачењето за време на телефонски разговори, без разлика дали се одвиваат надвор или низ канцеларијата.
Емили Мекграт, виша медицинска сестра специјализирана за кардиологија во Британската фондација за срце, ги поздрави резултатите од истражувањето, истакнувајќи дека „едноставното воведување повеќе движење може да го подобри општото здравје“.
Сепак, таа предупреди дека истражувањето се заснова на податоци што учесниците сами ги пријавувале и е релативно краткорочно, па затоа е потребно подолгорочно истражување за да се потврди неговото влијание врз здравјето на срцето.
