Најновото истражување го привлече вниманието кон една од најчестите намирници во секојдневната исхрана – кромидот.
Резултатите покажуваат дека луѓето на кои им се допаѓа неговиот вкус и мирис имаат помал ризик од развој на дијабетес тип 2 и висок крвен притисок. Научниците веруваат дека причината можеби не е само во кромидот, туку и во гените кои влијаат на сетилото за вкус и мирис.
Истражувањето опфатило повеќе од 160.000 испитаници, при што биле анализирани нивните генетски податоци, навиките во исхраната и здравствената состојба. Посебно внимание било посветено на гените поврзани со вкусот и мирисот, кои можат да влијаат на тоа која храна природно ја претпочитаат луѓето.
По детална анализа, изолирана е генетска варијанта поврзана со предиспозиција кон кромид. Понатамошното испитување покажа дека луѓето кои ја носат оваа варијанта имаат помала веројатност да развијат дијабетес тип 2 и висок крвен притисок.
Овој начин на истражување е познат како Менделова рандомизација. Станува збор за метод што користи генетски разлики за попрецизно да процени дали постои причинско-последична врска помеѓу навиките во исхраната и одредени болести, без да се потпира само на податоците што ги пријавуваат испитаниците.
Сепак, истражувачите нагласуваат дека резултатите не значат дека јадењето повеќе кромид само по себе ќе го спречи развојот на дијабетес или висок крвен притисок. Можно е биоактивните соединенија присутни во кромидот, исто така, да играат улога, но ова останува да се потврди со идни истражувања.
Експертите истакнуваат дека ваквите студии претставуваат важен чекор во разбирањето на врската помеѓу генетиката, исхраната и хроничните болести и би можеле да придонесат за попрецизни препораки за поздрава исхрана во иднина.
