Од почетокот на епидемијата во државата се регистрирани вкупно 156.078 лица дијагностицирани со ковид-19, а активни се 310 случаи. Според податоците на Министерството за здравство, во текот на вчерашниот ден беа регистрирани нови 24 случаи. Оздравени се шест пациенти, а вчера немаше пријавено починати лица.
Досега во земјата се направени вкупно 953.144 тестирања на ковид-19. Од стартот на пандемијата, вкупно им 150.276 оздравени пациенти, а 5.489 починати. Бројот на активни случаи изнесува 310.
Инаку, теренската вакцинација продолжува денеска, во повеќе населени места. Теренското вакцинирање без закажување почна од 12 јули годинава, во над сто населени места во сите општини низ државава.
Во меѓувреме, во Европа се шири делта сојот на вирусот, па надлежните предупредуваат за поголема претпазливост.
Во текот на вчерашниот ден, делта сојот и официјално беше потврден во Албанија. И таму властите апелираат на што поголема масовност за вакцинација во „најблискиот пункт за вакцинација, здравствен дом, центри за масовна вакцинација или со мобилните екипи“, со цел да се спречи ширењето на вирусот.
Поради новата мутација на вирусот, претходно грчкиот премиер, Кирјакос Мицотакис ги повика граѓаните задолжително да се вакцинираат, според членот 25 од грчкиот Устав.
Според грчкиот премиер, распространетата делта варијанта на коронавирусот е позаразна од оригиналниот вид, поради што „сега е поважно од кога било порано сите Грци да се вакцинираат“.
Бугарија пак, од вчера се затвори за патниците-странци кои ќе пристигнуваат од Холандија, Малта, Андора и Грузија.
На бугарските државјани кои пристигнуваат од овие земји, како и на лицата со постојано жителство во нив и членовите на нивните семејства, дозволен ќе им биде влез во земјата само со негативен тест за ковид-19, без разлика дали биле вакцинирани или не.
