Како што информираат од Општината, акцијата претставува продолжение на успешната есенска кампања и се реализира во соработка со Јавното претпријатие за комунални дејности.
На повеќе локации ќе бидат поставени специјални садови во кои граѓаните ќе можат бесплатно да го оставаат стариот и дотраен мебел и друг вид кабаст отпад.
Акцијата започнува во населбата Мичурин, каде што на 18 и 19 мај садовите ќе бидат поставени на улицата „Анастас Митрев“, зад паркот до трансформаторот, како и на улицата „Венијамин Мачуковски“, во близина на трансформаторот кај Железничката станица.
Потоа, на 20 и 21 мај, активностите продолжуваат во населбата Острово, каде што отпадот ќе може да се остава на улицата „Владимир Комаров“ бр. 9, до контејнерите, и на потегот од број 6 до 16, зад ТЦ „Скопјанка“.
Од Општина Аеродром посочуваат дека граѓаните за останатите локации и термини можат да се информираат на официјалната веб-страница, каде е објавен целосниот план за спроведување на акцијата.
Со оваа активност, како што наведуваат, им се излегува во пресрет на жителите, овозможувајќи организирано и бесплатно отстранување на кабастиот отпад, а воедно се придонесува и за заштита на животната средина и спречување на создавање диви депонии.
