Македонските бригадири меѓу кои и 13 млади и тројца возрасни членови од Здружението на граѓани „Акцијаш ветерани“ од Велес ќе работат на уредување на дел од плажите на езерото кое се наоѓа во близината на Нови Пазар, а воедно и ќе пошумуваат. Освен од Македонија има и бригада од домаќините од Србија, како и од Босна и Херцеговина, Словенија и Турција кои заедно ќе работат и ќе другаруваат.
Инаку неколу членови на ЗГ „Акцијаш ветерани“ од Велес и лани веќе учествуваа на оваа акција во Нови Пазар која трае од 2019 година.Денеска пред поаѓање, Аце Јосев акцијаш ветеран од ЗГ „Акцијаш ветерани“ од Велес кој е и заменик командант на бригадата за МИА изјави дека се среќни што и годинава ќе учествуваа на оваа акција, ќе ја средуваат плажата и ќе пошумуваат. Како што рече, младите меѓу кои и од Македонија ќе стекнат бригадирски искуства за работа, ќе се дружат и ќе стекнат нови пријателства.
Младите велешки бригадири Љупче Ставрев, Карло Бондиќов, Дарија Андреевска, Теодора Мицелинова, ученици од двете велешки училиште „Васил Главинов“ и „Блаже Конески“, како и останатите учесници пред заминување на ОРА „Нови Пазар 2026“ за МИА изјавија дека повеќепати учествувале на локални акции за чистење и пошумување, но сега првпат ќе бидат учесници на една меѓународна акција. Тие очекуваат интересни денови на ОРА „Нови Пазар 2026“ испонети со работа, многу пријателства, а се надеваат и на ударничка значка.
Инаку на покана на организаторите на акцијата замина и Делчо Костов претседател на ЗГ „Акцијаш ветерани“ од Велес, кој како искусен акцијаш ветеран ќе даде свој придонес во акцијата.
