Според Хоџа, откупот на грозјето ќе тече непречено, а тој очекува сите винарски визби да ги почитуваат договорените цени, односно 11 денари за „смедеревка“ и 13 за „вранец“.
„Генерализирање на лозарите не е коректно и не е во ред. Ако незадоволство имале одредени политичари, односно градоначалници, зашто не им успеало тоа што го планирале, навистина ми е жал што сакале да ја употребат маката на лозарите за да поентираат политички. Сум кажал и на самиот почеток, кажувам и сега, додека јас го водам Министерството, политика во земјоделството нема да има, нема да се делат не само лозарите, туку и сите други производителите по политички бои. Жал ми е што тоа некои политичари сѐ уште не го сфатиле, дури се обидуваат да добијат уште еден градоначалнички мандат на маката на лозарите. Жал ми е, зашто градоначалникот на Кавадарци го ценам како мој пријател. Не ми беше јасно што се случуваше тој ден. Но, со моја ургенција лозарите беа примени кај раковоството на ‘Тиквеш‘ за да разговараат и веднаш потоа откупот почна, но изгледа тоа не им одговараше на поединци и повторно го прекинаа откупот“, рече Хоџа, одговорајќи на новинарски прашања по средбата со црногорскиот колега Александар Стијовиќ.
Тој додаде дека е во постојана комуникација со лозарите и ништо од ветеното не е надвор од рамките на она што е разговарано.
„Точно е дека сум разговарал со винарските визби за поголема цена од ланската и точно е дека поголемите визби тоа го почитуваат. Има и такви што не го почитуваат, затоа свикав состанок само со визбите во средата, за да разговараме зошто е тоа така. Со оглед дека уште сме на почеток, нормално повеќето визби сѐ уште не почнале со откуп. Затоа за мене е несфатливо уште на почеток на откупот да се прави обид да се профитира политички на грбот на лозарите“, вели тој.
Како што рече Хоџа, вчера, тие што имале добро грозје и чиј откуп бил договорен, го предале во „Тиквеш“.
„Сметам дека откупот непречено ќе се одвива. Врз основа на информациите од терен и квалитетот на родот, очекувам дека нема да остане ниту килограм гројзе, а по среда, освен визбите што откупуваат, очекувам да се приклучат и другите и да се придржуваат до цените, 11 денари за ‘смедеревка‘ и 13 за ‘вранец‘. Будно и внимателно ја следиме ситуацијата, ако има потреба ќе дејствуваме како држава. Но, моја работа како министер е да воспоставиме ред меѓу лозарите и откупувачите, да не треба секоја година државата да одвојува огромни средства за оваа гранка. Ако е тоа потребно, ќе го направиме, но ако не е, нема да дозволиме преку обиди како завчера, да се профитира политички на грбот на лозарите“, истакна Хоџа.
