Романски државјанин остана заробен под урнатините откако вчера се урна дел од средновековна кула во близина на Колосеумот во Рим. Спасувачите успеаја да го извлечат жив, но подоцна почина во болница. Додека операцијата за спасување сè уште траеше, Марија Захарова на својот канал на комуникациската платформа Телеграм напиша дека сè додека италијанската влада „ги троши парите на своите даночни обврзници“ за поддршка на Украина, локалната економија и нејзините кули ќе продолжат да се уриваат.
Италијанскиот министер за надворешни работи Антонио Тајани ја критикуваше нејзината изјава, нарекувајќи ја „вознемирувачка“ и „неприфатлива“. „Италија нема да ја промени својата надворешна политика или своите принципи поради неодговорни вербални напади“, додаде тој.
Руската амбасада во Рим подоцна изрази сочувство на Фејсбук поради смртта на романскиот работник Октаво Строичи. Амбасадата додаде дека Москва ѝ ја пренела на Италија својата загриженост за она што го нарекоа „агресивна, неприфатлива антируска кампања“ во италијанските медиуми, предизвикана од претходните коментари на Захарова.
Италија силно ја поддржува Украина од почетокот на руската инвазија во 2022 година со воена опрема, обука и хуманитарна помош како дел од пошироките напори на НАТО и Европската Унија. Сепак, јавното мислење во Италија е поделено. Додека повеќето се противат на руската инвазија и го поддржуваат испраќањето хуманитарна помош, анкетите покажуваат дека многу Италијанци не се за испраќање оружје или ескалација на военото учество.
