„Оваа војна не остава среден пат, туку е сè или ништо“, напиша во средата на платформата Икс Мохамад Багер Галибаф, претседател на иранскиот парламент и главен преговарач. „Во овој регион, ако ние не можеме да ја продаваме нашата нафта, тогаш никој друг нема да може.“
„Нашата безбедност е предуслов за целата регионална инфраструктура; без неа ништо не останува безбедно“, додаде тој.
Зборувајќи за Ормускиот Теснец, кој е од клучно значење за глобалната трговија со нафта, Галибаф рече дека безбедноста на теснецот зависи од тоа таму да нема стационирани американски сили. Иран повеќепати изјави дека ситуацијата таму нема да се врати во состојбата каква што била пред војната.
Претходно американскиот претседател Доналд Трамп најави дека САД ќе уништат мост или електроцентрала во Иран секогаш кога Исламската Република ќе пука врз брод во Ормускиот Теснец.
Конфликтот меѓу САД и Иран повторно ескалираше на почетокот на јули околу контролата врз Ормускиот теснец, откако Иран нападна бродови во теснецот. САД напаѓаат цели во Иран веќе 11 ноќи по ред.
САД исто така повторно воведуваат поморска блокада против бродовите што пловат кон или од иранските пристаништа. Откако блокадата беше повторно воведена на почетокот на минатата недела, американските сили пренасочија девет бродови и онеспособија уште еден, според ЦЕНТКОМ, американската команда одговорна за регионот.
Иран инсистира бродовите да следат рута по должината на неговиот брег и постојано повторува дека само рутата низ Ормускиот теснец, како што ја утврди Техеран, е безбедна.
