„Најголемото и најважното прашање за Европа е дали САД се подготвени да бидат лојални како што е опишано во нашиот договор (…). За целото источно крило, моите соседи, прашањето е дали НАТО е сè уште организација која е политички и логистички подготвена да реагира, на пример, против Русија ако се обиде да нападне“, рече Туск во интервју за британскиот Фајненшл тајмс, објавија полските медиуми.
Туск ја повика ЕУ итно да ја зајакне својата клаузула за колективна одбрана според член 42 од Договорот за ЕУ, бидејќи може да се случи Русија „да не чека неколку години, туку да нападне една од земјите-членки за неколку месеци“.
„Ова е навистина сериозно. Зборувам за краток рок, месеци, а не години. Исклучително е важно за нас да знаеме дека сите ќе ги сфатат сериозно обврските кон НАТО, како што прави Полска. Вашингтон ја гледа Полска како свој најдобар и најблизок сојузник во Европа. Но, за мене, вистинскиот проблем е како ќе изгледа во пракса ако нешто се случи“, рече Туск.
Полскиот премиер рече дека имал проблем да убеди некои сојузници дека не можат да се однесуваат како ништо да не се случило кога Русија го наруши полскиот воздушен простор со повеќе од 20 дронови минатиот септември.
„Не ги убедив лесно нашите партнери од НАТО дека ова не е случаен инцидент, туку добро испланирана и подготвена провокација против Полска. На некои од нашите колеги им беше полесно да се прават дека ништо не се случило. Затоа сакам да бидам сигурен дека ако нешто се случи, Русија ќе знае дека реакцијата ќе биде решителна и обединета“, рече Туск.
Полскиот премиер нагласи дека тоа не значи дека се сомнева во Член 5, дали е обврзувачки, туку дека „копнее гаранциите на хартија да се преведат во нешто попрактично“.
