Рубио ја даде изјавата на состанокот на министрите за надворешни работи на земјите од Југоисточна Азија, еден ден откако три нафтени танкери со саудиска нафта наменета за азискиот пазар го сменија правецот на пловидба во Црвеното Море, очигледно поради заканите од јеменските Хути, кои се поддржани од Иран, пренесува Ројтерс.
Хутите, кои го контролираат брегот на влезот во Црвеното Море, во понеделник прогласија поморска блокада на Саудиска Арабија, отворајќи можен нов фронт во војната која, од 28 февруари, кога САД и Израел го нападнаа Иран, однесе илјадници животи низ Персискиот Залив. Бидејќи Иран веќе им се заканува на бродовите што минуваат низ Ормускиот Теснец, излезот од Персискиот Залив, Црвеното Море стана главна алтернативна рута за извоз на милиони барели саудиска нафта дневно.
Висок ирански функционер во понеделник за Ројтерс изјави дека Техеран преку посредници добил предлог за десетдневен прекин на огнот со цел да се спаси привремениот договор за примирје што САД и Иран го потпишаа во јуни, а кој го замени претходниот договор од април.
Како уште еден знак дека дипломатијата не е целосно замрена, иранскиот министер за внатрешни работи Ескандар Момени го посети Пакистан, еден од посредниците, и побара Исламабад да продолжи со посредничките напори.
Рубио изјави дека Вашингтон „секогаш е посветен на дипломатијата“, но дека се сомнева оти Техеран е подеднакво посветен на преговорите.
„Проблемот со кој моментално се соочуваме е тоа што тие не се сериозни кога станува збор за преговорите. Ако тие се сериозни, сериозни сме и ние. Ако не се, ќе го направиме она што е неопходно за да ги заштитиме нашите интереси, но и интересите на нашите сојузници“, изјави Рубио во Манила.
Тој нагласи дека на Иран не смее да му се дозволи контрола врз Ормускиот Теснец, бидејќи тоа би создало опасен преседан за целиот свет, вклучително и за земјите од Југоисточна Азија, од кои многу имаат територијални спорови со Кина во Јужното Кинеско Море.
„Ако на Блискиот Исток создадеме преседан според кој една држава може да одлучи да контролира меѓународен поморски пат, да наплаќа премин и, ако не ѝ платите, да ги потопува вашите бродови, тогаш сме создале многу опасен преседан што ќе се повторува и во други делови од светот, вклучително и во овој регион“, рече Рубио.
Бидејќи дипломатски напредок сè уште не е на повидок, американската војска во вторникот единаесетта ноќ по ред бомбардира цели низ Иран. Жителите на Техеран изјавиле дека во раните утрински часови во средата слушнале експлозии додека Иран ја активирал противвоздушната одбрана над главниот град, објави полуофицијалната новинска агенција „Фарс“.
Експлозии биле пријавени и во југоисточните крајбрежни градови Чабахар и Конарк, додека две експлозии се слушнале и во Бушер, каде што се наоѓа единствената иранска нуклеарна електрана, соопшти државната новинска агенција ИРНА.
Иран претходно гаѓал американски воени објекти во Бахреин, Кувајт и Јордан, а еден танкер бил погоден во Ормускиот Теснец. Техеран, исто така, соопштил дека погодил инфраструктура на компанијата „Амазон“ во Бахреин, каде што американската технолошка компанија има регионален центар за податоци. „Амазон“ не ги коментираше овие тврдења, а Ројтерс не можел независно да ги потврди.
Американскиот претседател Доналд Трамп потврди дека од почетокот на војната загинале вкупно 18 припадници на американските вооружени сили, меѓу кои четворица во иранските напади врз американски воени бази во Јордан и Ирак во текот на последните неколку дена.
