Јужнокорејската војска соопшти дека извршила потрага по бегалецот откако го забележала во 21:20 часот во саботата на источната страна на демилитаризираната зона (ДМЗ), која ја дели демократска од комунистичка Кореја.
„Потврдивме дека лицето ја преминало воената демаркациона линија околу 21 часот и 40 минути и побегнало во Северна Кореја“, соопшти војската, додавајќи дека не може да потврди дали лицето е сè уште живо, но ѝ јавиле на Северна Кореја за бегството и побарале заштита на личноста.
Овој премин се случува во време на строги рестриктивни мерки поради коронавирусот во Северна Кореја. Државата целосно ги затвори своите граници на почетокот на 2020 година и официјално не потврди ниту еден случај на инфекција со коронавирус.
Во септември 2020 година, севернокорејските трупи застрелаа јужнокорејски службеник за рибарство кој исчезнал на море, извинувајќи се подоцна и наведувајќи ги рестриктивните мерки против коронавирусот како причина.
Два месеци претходно, севернокорејскиот лидер Ким Џонг Ун прогласи вонредна состојба и го затвори пограничниот град откако севернокорејскиот дезертер, за кој тврдеше дека има ковид-19, илегално преминал од Јужна во Северна Кореја.
Долгорочните строги мерки и ограничувања за патување во државите, исто така, го зголемија бројот на бегалци од север кон југ.
