Системите „панцир“, познати како „убијци на дронови“ и чија цена по парче оди и до 19 милиони евра, се сметаат за најдобро руско решение за соборување мали, брзи, нисколетачки цели. Безбедносните мерки околу резиденцијата Валдај, на околу 300 километри од Украина, е значително зголемена поради загриженоста за растечките можности на Киев за напади со дронови со долг дострел.
Во 2024 година, околу комплексот имало само седум противвоздушни кули, околу една четвртина од сегашниот број, а изградбата на седум нови кули започнала на 17 март. Се вели дека распоредот на системот го отсликува оној околу Москва, со „панцири“ распоредени во два прстена околу вилата.
За споредба, целата московска метрополитенска област, со околу 20 милиони жители, минатата година имала само 60 вакви системи, нешто повеќе од двојно повеќе од бројот што сега го опкружува засолништето на Путин.
Во последниве години, Путин поминува сè повеќе време во своето оддалечено засолниште на Валдај. Се верува дека тоа е и дом на неговата наводна долгогодишна партнерка, Алина Кабаева, поранешна олимписка ритмичка гимнастичарка.
Се смета дека луксузната вила е добро бранета, бидејќи се наоѓа на полуостров помеѓу две езера и е опкружена со густа шума, што помага во заштитата од дронови.
Се верува дека комплексот Валдај содржи и бункер и верна реплика на канцеларијата на Путин во Кремљ, што му овозможува да ја скрие својата вистинска локација за време на видео повици или јавни обраќања.
Истражувачкиот портал „Проект“ претходно тврдеше дека имотот вклучува и крио-комора, солариум, амам, соба за третмани со кал и голем број приватни медицински содржини. Истрагите на опозициските руски медиуми во 2023 година открија дека Путин патувал до своите резиденции, вклучително и онаа во Валдај, со оклопни возови.
Порано овој месец, рускиот претседател ја зголеми и безбедноста околу својата резиденција „Бочаров Ручеј“ во Сочи, која не ја посетил од есента 2025 година. Според истражувачкиот портал „Агентство“, Руската федерална служба за заштита предложи нова безбедносна зона што се протега на повеќе од три квадратни километри околу имотот, на копно и на море. Летовите со беспилотни летала, закотвувањето бродови, поправки на возила, фрлање отпад и поставувањето транспаренти или стрелање се забранети во рамките на зоната.
Според Радио Слободна Европа, претходно оваа година, околу специјалната економска зона Алабуга во Татарстан беа изградени дваесет кули за воздушна одбрана со тешки митралези и неколку системи „панцир“.
Во комплексот се наоѓа најголемата фабрика во светот за производство на иранските камикази дронови „шахед-136“, која произведува илјадници летала месечно и се честа цел на украинските напади.
„Панцир“ е систем за воздушна одбрана со краток дострел дизајниран да ги заштити клучните објекти и воената инфраструктура од воздушни закани. Тоа е комбиниран систем кој вклучува топови и ракети на едно мобилно возило, овозможувајќи му брзо да реагира на различни цели како што се дронови, крстосувачки ракети, хеликоптери и авиони што летаат ниско.
Особено е ефикасен против мали и брзи цели на ниски височини. „Панцир“ може да следи повеќе цели истовремено и да работи во движење, а често се користи како последен слој на одбрана околу важни локации, надополнувајќи ги системите со долг дострел.
Сепак, системите „панцир“ се далеку од неуништливи. Безбедносната служба на Украина објави во февруари дека уништила половина од руските залихи на системите во напади со долг дострел врз воената инфраструктура во московскиот регион.
