„Намерата на Украина да се приклучи на НАТО со перспектива во близина на нашите граници да се појават системи за ракетни напади претставува неприфатлива закана за безбедноста на Русија, предизвикувајќи сериозни воени ризици за сите засегнати страни и води до конфликт од големи размери во Европа“, рече Лавров во интервју за сараевско Ослобоѓење.
Коментарите на Лавров за босанскиот медиум доаѓаат кога односите меѓу Русија и воениот блок предводен од САД остануваат во критична точка.
Москва, рече тој, смета дека е неопходно сите страни да го намалат „степенот на конфронтација“ предизвикан од начинот на кој Вашингтон се грижи за своите „украински штитеници“.
„Рускиот претседател Владимир Путин употреби конкретни примери за да го илустрира деструктивниот курс на Киев кој има за цел да ги разбие договорите од Минск и договорите постигнати во рамки на нормандискиот формат и изрази сериозна загриженост поради провокативните активности на Украина против Донбас“, рече Лавров.
Рускиот министер рече и дека непријателскиот курс на Вашингтон кон Русија создава токсична атмосфера и го попречува воспоставувањето нормална комуникација.
„Кога станува збор за руско-американските односи, забележувам дека се создаде нездрава атмосфера во односите со Вашингтон, се акумулираат многу проблематични прашања, Американците водат отворено непријателски курс: воведуваат санкции, изнесуваат неосновани обвинувања против нас, преземаат непријателски чекори. Сето тоа создава токсична атмосфера“, рече Лавров, додавајќи дека сеопфатен дијалог меѓу двете страни ќе обезбеди глобална стабилност.
