Како што телото учи да го препознава САРС-КоВ-2, било по природна инфекција или по вакцинација, Б-клетките произведуваат свежи антитела против вирусот ако нема доволно антитела што циркулираат во крвта што можат да го неутрализираат.
Б-лимфоцитите или Б-клетките им припаѓаат на белите крвни зрнца (леукоцити) и само тие можат да произведат плазма-клетки што лачат антитела. Б-лимфоцитите и Т-лимфоцитите заедно го формираат таканаречениот „адаптивен имунолошки систем“, кој може да се приспособи на нови или изменети патогени.
Б-лимфоцитите заедно со Т-лимфоцитите играат витална улога во одбраната на телото. Нивната главна функција е по активирањето и преминувањето во плазма-клетки да произведуваат антитела (имуноглобулини) и да преминат во категоријата мемориски клетки.
Ако Б-клетките се активираат преку овие тела на туѓи антигени, тие може да се развијат во плазма или мемориски клетки што произведуваат антитела. И колку подолго овие Б-лимфоцити остануваат во телото, толку поуспешно имунолошкиот систем може да се бори со различните варијанти на вирусот.
Б-клетките произведуваат антитела само кога се активирани
Приближно 5 до 15 проценти од лимфоцитите во крвта се Б-клетки, а тие се присутни и во слезината, лимфните јазли и крајниците. Нивната примарна функција е производство и лачење на антитела. Б-лимфоцитите произведуваат антитела само кога ќе се активираат. Созревањето на Б-лимфоцитите се одвива во коскената срцевина, но нивното активирање се случува во лимфните јазли.
Во студија објавена на веб-страницата биоАрхив, која допрва треба да се рецензира, истражувачите ја анализирале јачината на повеќе од 300 антитела произведени од мемориските Б-клетки, добиени од вакцинирани доброволци, но и луѓе што природно ја преболеле инфекцијата со корона.
„Омикрон се чини дека успеал да избегне многу голем дел од мемориските Б-клетки“, велат истражувачите, но додаваат дека „се чини дека сè уште ефикасно го препознаваат 30 отсто од вкупните антитела и близу 10 отсто од сите моќни неутрализирачки антитела“, заклучиле Матје Махевас и Паскал Шапер, научници од Универзитетот во Париз.
Тие веруваат дека силната способност на мемориските Б-клетки да се репродуцираат и да произведуваат антитела може да ја надомести нарушената ефикасност на овие антитела за помалку од два дена.
Во комбинација со другите компоненти на имунолошкиот систем, особено со Т-клетките, ефектот на Б-клетките веројатно придонесува во објаснувањето зошто повеќето вакцинирани лица заразени со омикрон не се разболуваат во толкава мера за да им биде потребна хоспитализација, велат француските научници.
