Според јужнокорејските прописи, за исхрана се одобрени само десет видови инсекти, меѓу кои се скакулци и штурци, но не и мравки. Покрај затворската казна за сопственикот, обвинителството побарало и парична казна за ресторанот во износ од 20 милиони вони, што е приближно 13.500 американски долари.
Службеници од Министерството за безбедност на храната и лековите започнале истрага откако на интернет пронашле рецензии од гости со фотографии од спорниот десерт. Истрагата покажала дека ресторанот во период од четири години употребил околу 49.000 мравки увезени од САД и Тајланд.
Весникот Чосун Дејли објави дека анализите на здравствените власти покажале оти мравките што ги користел ресторанот содржеле до 55 пати повеќе тешки метали од дозволеното ниво за јадливи инсекти. При одобрување на инсекти за исхрана, јужнокорејските власти ги разгледуваат ризиците за безбедноста на храната, токсичноста, хранливата вредност и можноста за нивно хигиенско одгледување.
Сопственикот на ресторанот признал дека служел мравки. Тој објаснил дека тие биле само „мал дел“ од менито од 15 јадења и дека се користеле како посип врз сорбе. Тој исто така нагласи дека гостите секогаш можеле да ја изберат верзијата без мравки.
Во своја одбрана, тој додаде дека само 60 проценти од гостите избрале да ги пробаат мравките, додека на останатите им биле послужени алтернативи како што се ферментиран оцет и јадливи цвеќиња. Тој исто така ја наведе меѓународната пракса, наведувајќи дека рестораните во Австралија, Данска и Обединетото Кралство редовно користат мравки како состојка.
Името на ресторанот и на сопственикот не се објавени во судските документи. Во Сеул, главниот град на Јужна Кореја, работат десет ресторани со две Мишелинови ѕвезди. Според критериумите на Мишелин, ова признание означува „исклучителна кујна“ поради која „вреди да се скршне од патот“.
Судската одлука во овој случај се очекува на 2 септември.
Инаку, мравките се консумираат и се сметаат за деликатес во повеќе култури во Азија, Африка и Латинска Америка. На пример, мравките ткајачи и нивните јајца се користат во тајландската и камбоџанската кујна, додека во Колумбија матиците на мравките се ценат како деликатес, споредлив со кавијарот.
