„Пред да побараат од Франција да го прошири својот нуклеарен чадор, нашите европски партнери мора да престанат да купуваат Ф-35 и наместо тоа да почнат да купуваат рафали“, изјави Бардела за француската телевизија ЛЦИ.
И покрај тоа барање, тој нагласи дека Франција треба да се држи до нуклеарната доктрина развиена од поранешниот претседател Шарл де Гол, според која „виталните интереси на Франција не завршуваат на нејзините граници“.
Бардела, кој го предводи Национален собир со Марин Лепен, води во анкетите пред претседателските избори во Франција следната година. Неговите изјави се одраз на слично, иако помалку експлицитно, предупредување претходно издадено од Лепен.
Осум европски земји – Германија, Полска, Грција, Холандија, Белгија, Данска, Шведска и Норвешка – разговараат за нуклеарна соработка со Франција како дел од иницијативата што ја поддржува францускиот претседател Емануел Макрон.
Ова вклучува заеднички нуклеарни вежби, споделување информации и, потенцијално, привремено распоредување на француски борбени авиони „рафал“ способни да носат нуклеарно оружје, во сојузничките земји.
Иако Бардела не ја оспори европската димензија на виталните интереси на Франција, барањето сојузничките земји да се откажат од авионите Ф-35 веројатно би го намалило ентузијазмот за француската нуклеарна иницијатива. Седум од осумте земји што преговараат со Франција веќе ги набавиле напредните борбени авиони Ф-35 на компанијата Локид Мартин, додека Грција истовремено користи и „рафали“. Шведска има свои борбени авиони „грипен“.
