„Нашата територија беше искористена за таков состанок без наше знаење. Не можам да коментирам за деталите бидејќи не бевме присутни на состанокот. Сепак, податоците за летовите ми дозволуваат да кажам дека тајната средба во Баку се одржала“, изјави Алиев за новинарите во Берлин за време на заедничката прес-конференција со германскиот канцелар Фридрих Мерц.
Според медиумските извештаи, неофицијална германска делегација, меѓу кои и Роналд Пофала, поранешен шеф на кабинетот на поранешната канцеларка Ангела Меркел, и Матијас Плацек, поранешен премиер на покраината Бранденбург, се сретнале во главниот град на Азербејџан со неколку блиски соработници на рускиот претседател Владимир Путин.
Во руската делегација наводно биле Валериј Фадеев, претседател на Советот на рускиот претседател за граѓанско општество и човекови права, и Виктор Зубков, поранешен вицепремиер на Путин, кој сега е претседател на одборот на директори на државниот енергетски концерн „Газпром“.
„Ако целта на таа средба била да се придонесе за завршување на војната меѓу Русија и Украина, можеме само да ја поздравиме“, рече Алиев, додавајќи дека средбата се одржала од 12 до 14 јули.
Германскиот канцелар Фридрих Мерц изјави дека неговата влада не била вклучена во организирањето на состанокот. „Не сум запознаен со каков било таков состанок“, одговори Мерц на новинарско прашање.
