„Одлични се“, кусо одговори Трамп на новинарско прашање за исходот од разговорите.
Тој ја пофали и самата локација, како и Кина.
„Одлично место. Неверојатно. Кина е прекрасна“, рече Трамп.
Според соопштението на кинеското министерство за надворешни работи, Си најавил нова ера во односите со САД, дефинирана како „конструктивен, стратегиски стабилен однос“.
Пекинг соопшти дека двајцата лидери се договориле за нова рамка за билатералните односи во следните три години и понатаму, со акцент на постабилно управување со конкуренцијата и разликите, пренесе Ројтерс.
Си истакнал дека таквата стабилност треба да значи соработка, контролирано натпреварување, управливи несогласувања и предвидлив мир.
Американската страна сè уште не објави целосно официјално соопштение од средбата.
Според Ројтерс, главни теми на разговорите биле трговијата, Тајван, војната меѓу Иран и САД, како и пошироките безбедносни прашања, при што и двете страни се обидуваат да го зачуваат кревкото трговско примирје.
Прашањето за Тајван остана без одговор, откако двајцата лидери го игнорираа новинарското прашање на таа тема.
Во меѓувреме, тензиите околу островот дополнително се засилија, откако Тајван ја обвини Кина дека е „единствениот извор на несигурност“ во регионот, по претходните кинески воени активности во близина на островот.
Различни извештаи од средбата на Трамп и Си: Вашингтон го истакнува Иран, Пекинг — Тајван
Белата куќа и Кина објавија значително различни извештаи за средбата меѓу Доналд Трамп и Си Џинпинг, откривајќи ги различните приоритети на двете страни.
Додека американското соопштение во голема мера се фокусира на Иран и кризата на Блискиот Исток, кинеската верзија само кусо го споменува тоа прашање.
Од друга страна, Пекинг силно го нагласува Тајван, тема што во американското соопштение воопшто не се споменува.
Според кинеското министерство за надворешни работи, Си му порачал на Трамп дека Тајван е „најважното и најчувствително прашање“ во односите меѓу двете сили и дека Вашингтон мора внимателно да пристапува кон него.
Американското соопштение, пак, става акцент на разговорите за Иран, регионалната безбедност и потребата од дипломатско решение за конфликтот.
Разликата во тоновите сугерира дека двете страни сакаат домашната и меѓународната публика да ја види средбата низ различна призма — Вашингтон како разговор за глобалните кризи, а Пекинг како потврда дека неговите клучни црвени линии се слушнати.
