„Верувам дека Европа сè уште поседува интелектуална сила и заедничка порака од големо значење. Проблемот е да не се дозволи таа да исчезне во лудилото на неуспешната интеграција, неуспешната Унија, која ни е неопходна“, оцени Проди во интервју за Фокус Европа – Италија на маргините на „Конференцијата за Европа на иднината“, неодамна одржана во Сиена.
Проди оцени дека „ЕУ, иако бавно, стана нужност“.
„Затоа не верувам дека оваа фаза на национализам и популизам е конечна. Додека постои Европа, популизмот е минлива фаза. Нашата судбина, ако сакаме да преживееме, е европското единство“, додаде тој.
Според него, за градење макар одреден европски идентитет е „потребно време, бидејќи тоа е првото политичко создавање во историјата кое не е создадено со оружје, туку со демократска согласност“.
„Секако дека сум разочаран од бавноста. Но, убеден сум дека не сме на крајот од европската мисија“, додаде Проди во интервју кое го емитуваше порталот ЕУалајв.
Проди кажа дека проблемот на ЕУ е „лудилото на едногласноста“ и дека се залага за „транзиција од едногласност кон демократска Европа, односно од парализа на едногласноста кон Европа од повеќе кругови, кон различни нивоа на интеграција“.
„Европа функционира и напредува преку демократија и верувам дека, порано или подоцна, тоа ќе се случи. Секако, оваа фаза на популизам ги отежнува работите. Но, тоа е процес кој не запира, освен ако не дојде до самоубиство. Претходно нè потсетивте дека цивилизациите исчезнуваат. Па, ако дозволиме Европа да исчезне, и цивилизацијата ќе исчезне“, заклучи Проди.
Поранешниот италијански премиер кажа и дека на изборите во 2027 година, граѓаните на Франција, Италија, Шпанија, Полска, Грција, Финска, Естонија и Словачка, што е приближно две третини од Европејците, ќе имаат заедничко прашање – продолжување или прекинување на процесот на европска интеграција.
„Да бидеме јасни, ниедна земја нема да ја напушти Европската Унија… Единствениот случај беше Британија, но во овој поглед таа дејствуваше како вакцина, бидејќи неуспехот на брегзит гарантира дека никој нема да ја напушти Унијата. Сепак, евентуалната победа на антиевропските партии би значела Европа што би била малку повеќе од зона на слободна трговија. Тоа би била трагедија, бидејќи осакатена Европа би ни оневозможила да играме каква било улога во светот“, додаде тој.
Проди оцени дека збирот на резултатите од изборите следната година дефинитивно ќе ја одреди брзината и насоката на развојот на Европа.
„Ако во некои земји исходот е негативен, Европската Унија нема да се распадне, но би можела да биде парализирана – и не знаеме колку долго“, кажа тој.
Зборувајќи за односот со Соединетите Американски Држави, Проди кажа дека „досега е општо прифатено дека Европа е сама“ и дека „САД повеќе не се брат на Европа по дефиниција“.
„Тоа е промена што ја сведочам во текот на целиот мој живот. Почнав со претседателите Буш, кои не припаѓаа на мојата политичка опција, туку беа Европејци по дефиниција, дури и во шегите. Потоа дојде Клинтон, кој, благодарение на својата политичка интелигенција, стана Европеец, не почна така, но стана еден. За Обама, Копенхаген и Сингапур беа иста работа. Потоа дојде Трамп, отворено непријателски настроен кон Европа. Но, нема враќање кон разбирањето дека САД и Европа се браќа по дефиниција“, оцени тој.
