На температури повисоки и од 40 Целзиусови степени, според прогнозите, аџиите полека ќе кружат околу Каба, најсветото место на исламот – црната структура во облик на коцка во центарот на Големата џамија во Мека.
Околу 1,4 милиони аџии пристигнаа во Саудиска Арабија пред повеќедневниот аџилак, еден од петте столба на исламот што сите муслимани мора да го извршат барем еднаш ако имаат доволно средства.
Властите ги засилија мерките против топлината, како што е дополнителна сенка, за да избегнат повторување на минатогодишниот исход, кога 1.301 лице починаа додека температурите достигнаа 51,8°C.
Денес аџиите ја посетија Каба седум пати, кон која муслиманите ширум светот се обраќаат да се молат секој ден.
Потоа се упатуваат кон Мина, местото каде што се наоѓа џиновскиот град од шатори, а потоа започнува најважниот дел од аџилакот: молитвата на планината Арафат, каде што се верува дека пророкот Мухамед ја одржал својата последна проповед.
По минатогодишниот смртоносен топлотен бран, властите мобилизираа повеќе од 40 владини агенции и 250.000 работници за да го намалат бројот на жртви од топлината.
Засенчените области се проширени, а илјадници дополнителни медицински работници ќе бидат во состојба на готовност. Ќе бидат распоредени и повеќе од 400 единици за ладење, изјави за Франс прес минатата недела саудискиот министер за организација на аџилакот, Тавфик ал Рабија.
Технологијата на вештачката интелигенција ќе помогне и во следењето на податоците и снимките, вклучително и од беспилотни летала, за подобро управување со огромните толпи.
Властите соопштија дека повеќето од смртните случаи минатата година биле меѓу нерегистрирани аџии кои немале пристап до климатизирани шатори и автобуси.
Оваа година, тие ги засилија своите мерки против нерегистрираните верници, користејќи чести рации, надзор со беспилотни летала и серии текстуални известувања.
Дозволите за аџилакот се доделуваат на земјите врз основа на квоти и се распределуваат на поединци преку лотарија. Дури и за оние кои можат да ги добијат, поради високите трошоци, многумина се обидуваат да се приклучат на аџилакот без дозвола, иако ризикуваат апсење и депортација.
Големите гужви на аџилакот се покажаа како опасни во минатото, а најсмртоносната беше во 2015 година, кога до 2.300 луѓе загинаа во стампедо за време на ритуалот „каменување на ѓаволот“ во Мина.
Саудиска Арабија, дом на најсветите светилишта на исламот во Мека и Медина, заработува милијарди евра секоја година од аџилакот, како и од помалото поклонение познато како Умра, во друг период од годината.
