Наградата што ја доделува фестивалот „Преку езерото“, а го носи името на актерската легенда Мето Јовановски, годинава му припадна на Тони Наумовски – уметник кој со години ја освојува светската сцена, особено Њујорк, но кој признава дека ниту еден успех не може да се спореди со признанието добиено од сопствената земја.
Наумовски открива дека првата реакција кога дознал дека е годинашниот лауреат била мешавина од изненадување, огромна чест и искрено задоволство.
„Секое признание значи, исполнува, мотивира, обврзува и е привилегија, особено кога доаѓа од дома. Мето Јовановски е голем мајстор кој играше во лига на светски шампиони. За жал, никогаш немав прилика да соработувам со него, но секогаш уживам, се радувам и му се восхитувам на неговите маестрални актерски остварувања“, вели Наумовски.
Тој истакнува дека фестивалот „Преку езерото“ има значајна улога во афирмацијата на медитеранскиот и балканскиот филм, но и во поврзувањето на уметниците од регионот.
„Фестивалот е исклучително важен. Дојран нуди атмосфера што спојува луѓе, идеи и уметници од регионот и пошироко, а токму фестивалот е местото каде што тие патишта се вкрстуваат. Во последните години македонските уметници брилираат насекаде во светот и тоа е гордост за сите нас“, додава актерот.
Наградата што го носи името на еден од најголемите столбови на македонското и балканското актерство за Наумовски има и силна емотивна вредност.
„Мето Јовановски не беше само актер, тој беше филмски титан. Мајстор кој суверено играше во лигата на светските шампиони. Мојата најголема жал е што никогаш немав прилика да застанам во ист кадар со него. Но неговите маестрални остварувања се моја инспирација – засекогаш ќе му се восхитувам и ќе се радувам на неговата бесмртна уметност“, порачува Наумовски.
За актерот, кој зад себе има богата меѓународна кариера и бројни признанија, наградата „Мето Јовановски“ претставува потврда дека најголемата вредност на секој успех е кога ќе биде препознаен и почитуван токму во татковината.
