Порталот Аксиос објави, повикувајќи се на американски официјални лица и други добро информирани извори, дека разговорите во вторник првично требало да се одржат во Швајцарија, но обновените непријателства доведоа до нивно преместување во главниот град на Катар.
Темата на разговорот исто така се промени – сега станува збор за несогласувања околу Ормускиот теснец. Во исто време, остануваат споровите и нерешените делови од Меморандумот за разбирање потпишан претходно овој месец.
Американскиот официјален претставник потврди дека страните се договориле да ги прекинат нападите и да продолжат со преговорите.
„Техничките преговори треба да започнат за сите делови од Меморандумот за разбирање, не само за Ормус. Двете страни засега ќе престанат со нападите и бродовите ќе можат слободно да се движат“, рече тој.
И покрај Меморандумот за разбирање потпишан на 17 јуни, двете земји разменија напади во последните денови, обвинувајќи се меѓусебно за кршење на прекинот на огнот, а контролата врз Ормускиот теснец е во центарот на тензиите.
Иран продолжува да инсистира на контрола на преминот низ важниот теснец, низ кој минува една петтина од светската нафта и течен природен гас.
Претходно, ирански функционер изјави дека Техеран не учествува на техничките разговори закажани за недела поради неодамнешните напади врз Иран и неисполнетите услови од Меморандумот за разбирање, кој требаше да ги запре борбите и повторно да го отвори Ормускиот теснец додека траат преговорите за прашања како што е нуклеарната програма на Иран.
Техеран се налути кога Оман минатата недела објави дека ќе биде отворена алтернативна рута низ Ормускиот теснец долж брегот на Оман, во согласност со Меѓународната поморска организација, агенција на ОН.
