Соединетите Американски Држави беа известени однапред за нападот, чија цел беше тунел долг 200 метри во местото Маџдал Зун, според соопштението на премиерот Бенјамин Нетанјаху и министерот за одбрана Израел Кац.
Нападот се случи два дена откако Либан и Израел постигнаа договор за безбедност, посредуван од САД, со цел намалување на непријателствата по должината на границата, објави Ројтерс. Договорот предвидува постепено повлекување на израелските сили од одредени делови на јужен Либан, со распоредување на либанската армија, додека на израелските трупи привремено ќе им биде дозволено да останат во проширената безбедносна зона.
Во израелското соопштение се наведува дека во тунелот биле пронајдени повеќе стотици парчиња оружје и лансери.
Нападот се случи само неколку часа откако израелската војска соопшти дека цел на нападите биле членови на Хезболах вооружени со рачни ракетни фрлачи, како и ракетен лансер во областа Набатија во јужен Либан.
Хезболах рано утрово соопшти дека израелските напади претставуваат „грубо“ кршење на прекинот на огнот до кој организацијата се придржуваше досега, додавајќи дека внимателно ги следи сите такви прекршувања и го задржува правото да „ја брани својата татковина и својот народ“.
Лидерот на Хезболах, Наим Касем, го отфрли безбедносниот договор, опишувајќи го како капитулација пред Израел. Тој рече дека групата ќе продолжи со вооружениот отпор.
Нетанјаху во соопштение објавено доцна во неделата изјави дека израелската војска ќе остане во безбедносната зона во јужен Либан и ќе „продолжи да ја уништува терористичката инфраструктура, да ги елиминира заканите за северните заедници и да ја штити безбедноста на израелските граѓани“.
Повеќе од еден милион Либанци беа принудени да ги напуштат своите домови во конфликтот, кој се одвива паралелно со поширокиот воен судир поврзан со Иран. Хезболах и Иран тврдат дека Вашингтон пред две недели се обврзал, како дел од меморандумот за разбирање со кој се стави крај на поширокиот конфликт, да обезбеди прекин на непријателствата и во Либан.
