Говорејќи на специјален настан на Американско-израелскиот совет (ИАК) под наслов „Америка 250“ во Тел Авив, организиран од американско-израелската претприемачка и филантропка Шари Арисон, Хакаби рече дека партнерството меѓу Вашингтон и Ерусалим се темели на заеднички вредности, историја и стратегиски интереси.
„Кога слушам луѓе како прашуваат: ‘Дали е можно Америка и Израел да се разделат и повеќе да не уживаат во ова извонредно партнерство?’, јас им велам: ‘Не, мора да разберете, ние не сме толку глупави. Се надевам дека никогаш нема да бидеме толку глупави’“, изјави Хакаби.
Хакаби го спореди односот меѓу двете земји со брак.
„Тоа е како неверојатен брак меѓу Израел и Соединетите Американски Држави. Кога ме прашуваат дали ќе се разведеме, велам: ‘Нема шанси’, затоа што ниту една земја не може да си дозволи да плаќа алиментација ако некогаш дојде до развод. Затоа ќе бидеме партнери сè додека постоиме“, рече тој.
Настанот беше организиран во рамките на програмата ИАК Америка 250, со која се одбележува претстојната 250-годишнина од основањето на Соединетите Американски Држави.
Хакаби нагласи дека односите меѓу САД и Израел се изградени врз јудео-христијанските вредности и оцени дека еврејскиот народ и Библијата одиграле клучна улога во создавањето на Соединетите Американски Држави.
„Додека ја славам Америка, го славам и наследството што како Американец го имам благодарение на еврејските темели врз кои се создадени и напредувале Соединетите Американски Држави“, изјави тој.
„Ако Соединетите Американски Држави некогаш го заборават своето наследство и Богот на Авраам, Исак и Јаков, повеќе нема да бидеме големата нација каква што станавме и ќе пропаднеме“, додаде американскиот амбасадор.
