Русија во текот на ноќта изведе еден од најголемите комбинирани воздушни напади врз Украина од почетокот на војната, при што главна цел беше Киев, јавуваат Ројтерс и Асошиејтед прес. Според украинските власти, најмалку две лица загинале, а бројот на повредени во украинската престолнина се искачи на 87.
Руските сили на 24 мај почнаа комбиниран напад врз Украина користејќи дронови и ракети лансирани од воздух, море и копно, распоредувајќи вкупно 690 воздушни средства. Главна цел на нападот беше украинската престолнина.
Украинските воздухопловни сили соопштија дека Русија употребила стотици беспилотни летала и десетици ракети во нападот, вклучително и балистички проектили, во една од најголемите воздушни офанзиви досега. Според украинските служби, оштетени се десетици локации низ Киев, меѓу нив станбени згради, административни објекти и цивилна инфраструктура.
Оштетувања на цивилна и административна инфраструктура се регистрирани на 49 локации низ украинската престолнина, пренесува Укринформ.
Во Шевченкивскиот реон, каде што петкатна станбена зграда беше делумно уништена во директен удар, спасувачите од урнатините ги извлекоа телата на две жени.
Руските сили во изминатите 24 часа извршиле 753 напади врз 48 населени места низ Запорошката област, каде што три лица се повредени.
Украинските сили за противвоздушна одбрана наведоа дека неутрализирале 246 од 262 дрона што руските сили ги лансирале од синоќа врз цели низ северна, јужна и источна Украина.
Нападите сè уште се во тек, наведоа украинските вооружени сили, кои на 24 мај имале вкупно 233 борбени судири со руските сили, а најтешките борби биле на правците Покровск и Гуљајполе.
Украинскиот претседател Володимир Зеленски го осуди нападот и повика на дополнителен меѓународен притисок врз Москва, додека западни сојузници го осудија нападот врз цивилни цели.
Нападот доаѓа во период на застој во дипломатските напори за прекин на војната, додека борбите на фронтот и воздушните напади продолжуваат со висок интензитет.
