Откако Австралија минатата година воведе пионерска забрана за социјалните мрежи за деца, сè поголем број европски земји размислуваат за свои ограничувања, бидејќи расте загриженоста за влијанието на социјалните мрежи врз здравјето и безбедноста на малолетниците.
„Ве оставивме во оваа џунгла и таа ви го одзема вниманието“, им рече Макрон на средношколците, зборувајќи за недостигот од правила на социјалните мрежи. „Мораме да успориме и да ви помогнеме да станете возрасни, а пред сè граѓани“.
„Затоа сакаме да воведеме правило дека повеќе нема социјални мрежи пред 15-годишна возраст. Исто така, би сакале да имаме ден без интернет еднаш месечно… за да покажеме дека е можно“, кажа тој, додавајќи дека денот би можел да се користи за читање на глас, театар или други активности.
Во Франција во парламентарна процедура е нацрт-закон чија цел е да се воведе забрана за лица под 15 години. Но, додека Долниот дом гласаше за целосна забрана, сенаторите сакаат да го блокираат пристапот само до платформи кои се сметаат за штетни за децата. Ова значи дека целта на Макрон новиот закон да се усвои до почетокот на новата учебна година во септември можеби нема да биде постигната.
Досега најмалку десетина европски земји, вклучувајќи земји кои не се членки на ЕУ како Британија и Норвешка, усвоија или размислуваат за закони со кои се воведува минимална возраст – обично помеѓу 13 и 16 години – за користење на социјалните мрежи. Во меѓувреме, Европската Унија подготвува апликација за проверка на возраста.
Кипар последен објави планови за воведување забрана, откако претседателот Никос Христодулидес изјави дека неговата земја ќе одреди 15 години како минимална возраст за отворање и користење сметки на социјалните мрежи.
Подоцна во текот на вчерашниот ден Макрон одржа видео повик со другите лидери на ЕУ заложувајќи се за заеднички пристап. Целта на конференцијата е создавање „дигитална зрелост“ во Европа, ограничување на пристапот на деца под одредена возраст и воведување задолжителна проверка на возраста, соопштија официјални лица.
Во Вилер-Котерет во северна Франција, каде што Макрон изложи некои од своите планови, средношколците имаа поделени мислења за забраната.
„Мислам дека првенствено зависи од родителите да ги контролираат своите деца“, кажа дванаесетгодишниот Ердем Дуран. Фабиен Андроник, кој има 15 години, исто така се спротивстави на забраната. „Ги сакам социјалните мрежи, учиме многу таму“, кажа тој.
Но, Манел Зеруали, исто така на 15 години, ја поддржа забраната за лица под 15 години за да ги заштити. „Постои сајбер малтретирање на социјалните мрежи“, нагласи таа.
Сепак, сите се согласија за едно нешто – дека повеќето млади луѓе ќе најдат начин да ја заобиколат забраната.
Австралија забележа пораст на преземања на виртуелни приватни мрежи (ВПН) откако беше воведена забраната за социјалните медиуми, бидејќи корисниците се обидуваат да ја заобиколат мерката и да пристапат до ограничените платформи.
