Морнарицата и воздухопловните сили на Револуционерната гарда соопштија дека извеле заеднички напад со беспилотни летала и ракети врз американска инфраструктура и воени објекти.
Меѓу целите се наведени кампот Арифџан и воздухопловната база Али Ал Салем во Кувајт, како и воздухопловната база Шеик Иса и базата Џуфаир во Бахреин.
Во Џуфаир се наоѓа Поморската база за поддршка на американската морнарица, главната база на Петтата флота на САД во Персискиот Залив.
Од Револуционерната гарда соопштија дека нападите се одговор на американските воздушни удари врз јужните крајбрежни покраини на Иран и врз два моста во источниот дел на земјата, објави ИРИБ.
Претходно, според полуофицијалната новинска агенција Тасним, Револуционерната гарда соопшти дека САД погодиле железнички мост во Акали, област североисточно од Техеран.
Иранските медиуми објавија видеоснимка од оштетениот мост, а Си-ен-ен со геолокациска анализа потврди дека снимката е автентична. Телевизијата побара коментар од Централната команда на САД (ЦЕНТКОМ) за нападот врз мостот.
Во своето соопштение, ЦЕНТКОМ наведе дека американските сили погодиле „90 ирански воени цели“ долж крајбрежјето, но не го спомена мостот.
Властите во Бахреин и Кувајт потврдија дека во четвртокот наутро биле активирани сирените за воздушна опасност.
Кувајтската војска соопшти дека нејзината противвоздушна одбрана одговара на „непријателски закани со ракети и беспилотни летала“.
Иранската Револуционерна гарда предупреди дека ќе ги прошири своите напади и врз други американски бази во регионот доколку САД возвратат, се наведува во соопштението објавено од ИРИБ.
