Станува збор за најголемата и најмоќната компјутерска инфраструктура што Австрија ја изградила досега.
Новиот австриски суперкомпјутер има моќност од 45 петафлопи, има повеќе од 1.000 графички процесори Енвидиа Х100 и ќе биде достапен за универзитети, истражувачи, компании и јавни институции.
Со вкупни перформанси од 45,11 петафлопи, компјутерскиот систем е повеќе од осум пати помоќен од претходните австриски суперкомпјутери VSC-4 и VSC-5. Системот е дизајниран да поддржува широк спектар на апликации, од сложени научни симулации до развој на напредни модели на вештачка интелигенција.
Од особен интерес е фактот дека системот има повеќе од 1.000 графички процесори Енвидиа Х100, кои претставуваат една од најнапредните платформи за тренирање на големи јазични модели и други модерни системи со вештачка интелигенција.
Австриските универзитети што учествуваат во проектот ќе можат да го користат MUSICA без дополнителни трошоци, додека компаниите и другите институции ќе добијат пристап преку модел „плаќај колку што користиш“.
Суперкомпјутерот ќе се користи за истражувања во областите на физиката, хемијата, инженерството, медицината, биотехнологијата, климатската наука, заштитата на животната средина и многу други дисциплини што бараат огромна процесорска моќ.
Една од уникатните карактеристики на проектот е тоа што системот MUSICA ќе обезбеди пристап и до првиот австриски квантен компјутер, OTTER, базиран на технологија на јонски стапици.
На овој начин, Австрија ги спојува трите клучни технологии на иднината: високо-перформансно пресметување, вештачка интелигенција и квантно пресметување, со цел зајакнување на нејзината конкурентност во европскиот истражувачки простор.
За разлика од класичните суперкомпјутери лоцирани во еден центар за податоци, MUSICA е дистрибуиран на три локации – во Научниот центар на Технолошкиот универзитет во Виена, на Универзитетот во Инсбрук и на Универзитетот „Јоханес Кеплер“ во Линц.
Иако физички одвоени, сите системи функционираат како една единица, што ја зголемува сигурноста на работата и овозможува продолжување на процесите на пресметување дури и во случај на проблем на една од локациите.
Дизајнерите посветија посебно внимание на потрошувачката на енергија. Повеќето системи користат директно ладење со топла вода, каде што процесорите и графичките процесори се ладат без класични системи за вентилација. Таквото решение овозможува користење на природно ладење во текот на целата година, што значително ја намалува потрошувачката на електрична енергија во споредба со традиционалните суперкомпјутери.
